Өзбекстан миллий чемпионатының суперлигасында қатнасып атырған Наманганның «Нәўбәҳәр» командасына россиялы белгили қәниге Андрей Канчельскис бас тренер етип тайынланды.

Наманган қаласындағы «Орайлық» стадионында жаңа бас тренерди таныстырыў мәресими болып өтти. Андрей Канчельскис республикамыздың футбол ышқыпазларына жақсы таныс. Ол 1969-жылы Украинаның Кировоград қаласында туўылған. Украинаның «Звезда», «Динамо Киев», «Шахтёр», Россияның «Сатурн», «Крылья Советов», Англияның «Манчестер Юнайтед», «Эвертон», «Манчестер Сити», «Саутгемптон», Италияның «Фиорентина», Шотландияның «Рейнджерс», Саудия Арабстанының «Ал Хилол» командаларында ойнаған. Бурынғы аўқам, ҒМДА, Россия сайланды командаларының қурамында 59 ойында қатнасып, қарсыласлардың дәрўазасына 10 топ өткерген. Ол бурынғы аўқам чемпионатының қола медалы, бурынғы аўқам кубоги, Европа суперкубоги, Англия чемпионы, кубоги, лига кубоги, суперкубоги, Шотландия чемпионы, кубоги, лига кубоги, Саудия Арабстаны кубоги, жаслар арасында Европа чемпионы жеңимпазы болған.

Тренерлик хызметин 2009-жылы «Торпедо-ЗИЛ» командасында баслаған болса, кейин ала Россияның «УФА». «Волга», «Солярис», Латвияның «Юрмала» командаларында ислеген.

Наманганның «Нәўбәҳәр» командасы бүгинги күни Өзбекстан миллий чемпионатының суперлигасында Ташкенттиң «Локомотив, «Пахтакор» командаларынан кейин 21 упай менен турнир кестесинде үшинши орында киятыр.

Еслетип өтемиз, «Нәўбәҳәр» командасының қурамында Қарақалпақстан футбол мектебиниң тәрбияланыўшысы Азамат Алланиязов та ойнайды.

Қарақалпақстан хабар агентлиги.