Усы жылдың 8-октябрь күни Бердақ атындағы Қарақалпақ мәмлекетлик университетиниң мәденият сарайында «TechnoWays» технологиялық раўажланыў марафоны республикалық басқышының салтанатлы ашылыў мәресими болып өтти.
Илажға Қарақалпақстан Республикасы Жоқарғы Кеңеси ҳәм Министрлер Кеңеси, Өзбекстан Республикасы ҳәм Қарақалпақстан Республикасы Жоқары билимлендириў, илим ҳәм инновациялар министрликлериниң ўәкиллери, жоқары оқыў орынларының басшылары, исбилерменлер, марафонның Қарақалпақстан Республикасы, Ташкент қаласы ҳәм ўәлаятлардағы жоқары оқыў орынлары және аймақлық басқышларында жеңимпаз болған 100 ден аслам инноватор жаслар, сондай-ақ, кең жәмийетшилик ҳәм ғалаба хабар қуралларының ўәкиллери қатнасты.
Ашылыў мәресиминде Қарақалпақстан Республикасы Министрлер Кеңеси Баслығының мәсләҳәтшиси М.Елмуратов, Өзбекстан Республикасы Жоқары билимлендириў, илим ҳәм инновациялар министрлигиниң инновациялар миллий офиси бас директоры Ф.Жумаев, Қарақалпақстан Республикасы Жоқары билимлендириў, илим ҳәм инновациялар министри Б.Қайыпбергенов ҳәм басқалар шығып сөйлеп, өткерилип атырған илаждың әҳмийетине кеңнен тоқтап өтти.
Атап өтилгениндей, «TechnoWays» технологиялық раўажланыў марафоны жоқары оқыў орынларындағы илимге қуштар, қәбилетли жаслардың инновация, стартап, технология, программаластырыў бойынша билимлерин арттырыў, жойбарлар жаратыў ҳәм коммерцияластырыў көнликпелерин қәлиплестириўге бағдарлаўда үлкен әҳмийетке ийе болып табылады.
Марафонның жоқары оқыў орынлары және аймақлық басқышлары программалық тәмийнат ҳәм технологиялық шешим бағдарлары бойынша илимий ҳәм инновациялық идеялар, жойбарлар, сондай-ақ, басламалары болған 30 жасқа шекемги мыңлаған перспективалы және инноватор жасларды бирлестире алған ири жойбарлардың бирине айланды.
Мағлыўмат орнында атап өтиў керек, 11-октябрьге шекем даўам ететуғын марафонда қатнасыўшылар «3D модельлестириў», «DroneRacing» бағдарларында онлайн ҳәм әмелий түрде инновациялық идеялар жаратыў бойынша билим ҳәм көнликпелерге ийе болады.
Марафон даўамында қатнасыўшылар тийисли бағдарлар кесиминде өзлериниң инновациялық ҳәм программалық жойбарларының презентацияларын өткереди.
Қатнасыўшылардың инновациялық жойбарлары тийисли тараў қәнигелеринен ибарат экспертлер қурамы тәрепинен белгиленген критериялар тийкарында баҳаланады.
Сондай-ақ, марафон шеңберинде қатнасыўшылар менен биргеликте ҳәр қыйлы мәдений-ағартыўшылық илажлары шөлкемлестириледи.
Ашылыў мәресиминде сөзге шыққанлар усындай жоқары мақсетлерди гөзлеген марафон қатнасыўшыларына табыслар тиледи.
Илаж жоқары оқыў орынларының талантлы студентлериниң атқарыўындағы концерт бағдарламасы менен даўам етти.
Ә.Жийемуратов,
Қарақалпақстан хабар агентлиги