Шаңарақ инсан өмириниң тийкарғы буўыны болып табылады. Некеден алдын келин-күйеўлерди медициналық тексериўден өткериў айрықша әҳмийетке ийе.  Бул шаңарақтың беккем болыўы менен бирге туўылыжақ перзентлердиң бәркамаллығын тәмийинлейди.

Өзбекстан Республикасы Министрлер Кабинетиниң 2003-жыл 25-августдтағы “Некелениўши шахсларды медициналық тексериўден өткериў туўралы режени тасыйықлаў ҳаққында”ғы қарары тийкарында болажақ келин-күйеўлер медициналық тексериўден өткериледи. Буннан гөзленген мақсет расалық ҳәм нәсиллик кеселликлердиң алдын алыў, шаңарақта саламат турмыс тәризин қәлиплестириўден ибарат.

Некеден өтиўшилер ПҲАЖ уйымлары тәрепинен берилген жоллама менен медициналық тексериўден өтеди. 2021-жылдың 1-июнинен пуқаралардың турақлы ( ўақтынша) дизимнен өткен жерине қарамастан,  пуқаралық ҳалаты актлерин жазыў, некелениўши шахсларды медициналық тексериўден өткериў сыяқлы әмелиятлар экстерриториаллық принцип тийкарында әмелге асырылады.

Быйылғы жылдың өткен 8 айы даўамында  1496 неке дизимге алынған. Соннан  1201 некеден өтиўши медициналық тексериўден өткерилди. Буннан тысқары перзенти барлығы себепли 595, ҳәмиледарлығы себепли 973 пуқара тексериўден өтти. Некеден алдын некеден өтиўшилерден 9, соннан 3 пуқарада руўхый, 5 пуқарада туберкулез ҳәм бир пуқарада тери кеселлиги анықланды. Оларға тийисли емлеў мәкемелерине жоллама берилип, қадағалаўға алынды.

Барлық некеден өтиўшилер, әлбетте, медициналық тексериўден өткерилиўи тийис. Себеби шаңарақ беккем болса, жәмийет беккем ҳәм турақлы болады.

Камал ЮЛДАШЕВ,

Нөкис қалалық медицина бирлеспесиниң жоқары категориялы шыпакери.

Күнсулыў ДӘРЬЯБАЕВА,

Жоқары категориялы мийирбийке.

Қарақалпақстан хабар агентлиги