Алдын хабар бергенимиздей, усы жылдың 21-24-май күнлери аралығында Ташкент қаласында жоқары оқыў орынлары студентлери арасында регби-7 бойынша «Универсиада-2023» спорт жарысларының республикалық финал басқышы болып өтти.
«Универсиада» спорт ойынлары қатарында биринши мәрте өткерилген жарысқа қызығыўшылық ҳәм таярлықлар оғада қызғын болды.
Жарыста Әжинияз атындағы Нөкис мәмлекетлик педагогикалық институты ҳәм Бердақ атындағы Қарақалпақ мәмлекетлик университети студентлеринен ибарат Қарақалпақстан Республикасы сайланды командасы мүнәсип қатнасып, Самарқанд, Наўайы ўәлаятлары ҳәм Ташкент қаласы командаларын жеңип шықты. Ферғана ўәлаяты командасы менен болып өткен ярым финал ойынында командамызға бираз әўмет жетиспеген болса, 3-орын ушын өткерилген жарыста жерлеслеримиз Наманган ўәлаяты командасына ҳеш қандай имканият қалдырмады.
Солай етип, сайланды командамыз ағзалары регби-7 бойынша «Универсиада-2023» спорт жарысларының республикалық финал басқышында қола медальларына ийелик етти.
Команданы жарысқа тренер Жеткербай Базаров ҳәм НМПИ спорт клубы баслығының орынбасары Атабай Ережеповлар таярлады.
Спортшыларымызды қолға киргизген табыслары менен қутлықлаймыз!
Қарақалпақстан хабар агентлиги