Кеше Аргентинада өткерилип атырған футбол бойынша 20 жасқа шекемги футболшылар арасындағы жәҳән чемпионатында 2-тур ойынлары болып өтти.
«А» топарында қатнасып атырған Өзбекстан сайланды командасы Жаңа Зеландия командасы менен өз-ара ойын өткерип, онда 1 упай алыўға еристи. Атап айтатуғын болсақ, ушырасыўдың 1-таймында жаңа зеландиялы футболшылар Өзбекстан дәрўазасына еки гол жоллап, футбол жанкүйерлерин әдеўир албыратып таслады.
Ал, 2-таймда болса сайланды командамыз футболшылары өзлериниң комбинацияларын голға айландырыўға еристи ҳәм ойын
2:2 есабында жуўмақланды.
Усы топардағы екинши ойында болса, Аргентина Гватемала сайланды командасы менен ушырасып, 3:0 есабында жеңиске еристи ҳәм келеси басқышқа жолламаны қолға киргизди.
Сондай-ақ, кеше «В» топарында да еки ойын болып өтти ҳәм онда АҚШ Фижиди 3:0, Эквадор Словакияны 2:1 есабында жеңип шығыўға миясар болды.
Адилбай Оразов,
Қарақалпақстан хабар агентлиги шолыўшысы