Ташкент қаласында өткерилип атырған бокс бойынша жәҳән чемпионаты өзиниң шешиўши басқышына келип жетти.
Атап айтатуғын болсақ, кеше барлық салмақ категориялары бойынша шерек финал ушырасыўлары болып өтти.
Соның ишинде, Өзбекстан сайланды командасының 11 боксшиси ярым финал жолламасы ушын гүрес алып барды. 51 кг салмақта Ҳасанбой Дўсматов япониялы Томоя Цубоиды, 57 кг да Абдумалик Халoков иорданиялы Ишиш Юсуфты, 63,5 кг да Руслан Абдуллаев франциялы Лоунес Хамраоуиди, 71 кг да Саиджамшид Жафаров россиялы Игорь Свиридченковты, -92 кг да Лазизбек Мулложонов кубалы Сезар Ла Крузды, 54 кг да Айбек Жўраев испаниялы Габриэль Эскобарды, 67 кг да Асадхўжа Мўйдинхўжаев кубалы Рониэль Иглесиасты, 75 кг да Аълохон Абдуллаев венгриялы Филип Акиловты, +92 кг да Баҳодир Жалолов қазақстанлы Қамшибек Конкабаевты жеңип шығыўға миясар болды.
Тилекке қарсы, 60 ҳәм 86 кг салмақларда рингке шыққан Мужибилло Турсунов ҳәм Шоҳжаҳон Абдуллаевлар Россия ҳәм Әзербайжаннан келген боксшилерге жеңилип қалды.
Солай етип, ең көп ярым финал жолламасын қолға киргизген сайланды командалар арасында Өзбекстан 9 боксши менен биринши орынды ийелеп тур.
Ал, Куба, Россия сайланды командаларынан 6, Қазақстаннан 5, Франция, Грузия, Ҳиндстан ҳәм Испаниядан 3, Армения, Әзербайжан, Бразилия, Монғолиядан 2, Қытай, Италия, Иордания, Қырғызстан, Мексика, Тәжикстаннан 1боксшиден ярым финалға шығыўға еристи.
Ярым финал беллесиўлери 12-май күни болып өтеди.
Адилбай Оразов,
Қарақалпақстан хабар агентлиги шолыўшысы