5-7-май күнлери Ташкент ўәлаятында таў велоспорты MTB(Mountain Bike) бойынша Өзбекстан чемпионаты болып өтти.
Оған Қарақалпақстан Республикасы, Ташкент қаласы ҳәм барлық ўәлаятлардан жас велоспортшылар қатнасып, таўға көтерилиў, командалық эстафета, cross-country бағдарлары бойынша өз-ара жарысқа түсти.
Өткерилген жарыслар жуўмағында, республикамыздан Закима Толыбаева, Арыўхан Оразбаева, Диана Ерназарова, Мейрамбек Боранбаев, Азамат Полатбаев, Аллаяр Кәримбаев, Гүлбәҳәр Хожаназарова, Қыяс Мақсетбаев, Алпамыс Қуўанышбаев, Динара Атажанова, Бегис Кәримбаев, Нургүл Ғанибаевлар Өзбекстан чемпионы атағын жеңип алыўға миясар болды.
Ал, Айсулыў Қудайбергенова, Қабыл Шәрибаев, Қыяс Мақсетбаев, Диана Атажанова, Мурат ҳәм Султан Арысланбаевлар екинши, Алина Оразбаева, Мийрас Полатбаев, Турсынгүл Алламуратова, Султанбек Абдикаримов, Гөззал Оралбаева ҳәм Бегзат Сайымбетовлар үшинши орынды ийелеўге еристи.
Республикамыз спортшыларын бул жарысқа Фазылбек Арысланбаев, Бердақ Қудайбергенов, Гөззал Қудайбергенова, Илҳам Есалиев, Совет Ерназаров, Рахат Турымбетов ҳәм Ибрайым Нарымбетовлар таярлады.
-Кегейли районында велоспорттың ашылғанына онша көп ўақыт болғаны жоқ. Соған қарамастан оған қызығыўшылар саны артып, шәкиртлеримиз ҳәр қыйлы жарысларда сыйлы орынларды ийелеп келмекте. Ташкент ўәлаятында өткерилген Өзбекстан чемпионатында Нургүл Ғанибаева деген шәкиртим барлық қарсыласларын жеңип шығып, чемпион атанды. Мен ушын бул үлкен қуўаныш дейди,-Кегейли районы спорт мектеби тренери Ибрайым Нарымбетов.
Адилбай Оразов,
Қарақалпақстан хабар агентлиги шолыўшысы