Ташкент қаласындағы Республика қәнигелестирилген онкология ҳәм радиология илимий-әмелий медицина орайының шыпакери, медицина илимлериниң кандидаты Хуршиджон Абдукаримов республикамызға келип, жергиликли шыпакерлер менен биргеликте жоқары технологиялық заманагөй емлеў усыллары жәрдеминде операцияны әмелге асырды.
-Онкологиялық кеселлигим бар екенин еситип, шаңарағымыз бенен қыйналдық, -дейди Әмиўдәрья районы «Ақ алтын» аўыл пуқаралар жыйыны турғыны М.Сапарниязов. – Онкология орайы Қарақалпақстан филиалына шыпа излеп келген едик, шыпакерлер жақсы күтип алды. Ҳеш қандай машқалаларсыз тексериўлер өткерип, бийпул операция иследи. Операция әўметли өткенинен барлығымыз қуўандық. Бундай имканиятларды жаратып берген Президентимизге, қалаберди, дәртиме даўа тапқан шыпакерлерге миннетдаршылық билдиремен.
Республика қәнигелестирилген онкология ҳәм радиология илимий-әмелий медицина орайының Қарақалпақстан филиалында барлық түрдеги операциялар жолға қойылған. Атап айтқанда, таяныш ҳәрекет ағзаларындағы рак бойынша операциялар әмелге асырылмақта. Өзбекстанда биринши мәрте таз сүйеклериниң ярымын резекциялап, исикти алып таслаў ҳәм наўқастың аяғын сақлап қалыў операциясы Нөкисте әмелге асырылды.
Сондай-ақ, Х.Абдукаримов Республика қәнигелестирилген онкология ҳәм радиология илимий-әмелий медицина орайы Қарақалпақстан филиалының жетекши қәнигелерине әмелиятта қолланып атырған усыллары ҳаққында мағлыўмат берип, өз-ара тәжирийбе алмасты.
– Онкологиялық кеселликлерди емлеў бойынша дүньяның жетекши мәмлекетлеринде болып, бүгинги күнде қолланылып атырған операция, емлеў усылларын үйренип, тәжирийбе арттырып келдик, -дейди Х.Абдукаримов. – Усы билимлеримизге сүйенип, ҳәзирги ўақытта емлеў илажларын әмелге асырмақтамыз. Бүгин филиалдың жетекши қәнигелери менен әмелге асырылып атырған операциялар ҳәм оннан кейинги емлеў илажларын және де нәтийжели шөлкемлестириў бойынша пикир алыстық. Бунда наўқаслардың бүгинги күндеги жағдайы, кеселлик тарийхы ҳаққында мағлыўматларды биргеликте талқылап, дурыс емлеў жолларын белгилеп алдық.
Қарақалпақстан хабар агентлиги