Глобал экологиялық фонды тәрепинен “Арал теңизи бассейни ландшафтының жарамсыз жерлеринде турақлы турмысты тәмийинлеўди қоллап-қуўатлайтуғын тийкар сыпатында көллер, суў-батпақлы жерлер ҳәм жағалық бойындағы аймақларды сақлаў ҳәм басқарыў” жойбарын әмелге асырыў қоллап-қуўатланды.
Жойбардың улыўма баҳасы 3 миллион 552 мың 968 АҚШ доллары болып, ол бес жылға мөлшерленген.
–Жойбарды әмелге асырыўдан мақсет, Аралбойы регионында топырақ деградациясының алдын алыў ҳәм қайта тиклеў системасын басқарыўды жетилистириў, тәбийғый ландшафтларды сақлаў, жерлерден нәтийжели пайдаланыў арқалы экосистеманың турақлылығына ерисиў болып табылады.–дейди Қарақалпақстан Республикасы Экология ҳәм қоршаған орталықты қорғаў комитетиниң баспасөз хаткери Улбосын Мырзаназарова.–Сонлықтанда ол бизиң аймағымыз ушын әҳмийетли болған жер ҳәм суў ресурсларынан нәтийжели пайдаланыў системасын басқарыўды буннан былай да жетилистириў тийкарында экосистеманың турақлылығына ерисиўге хызмет етеди.
Бирлескен Миллетлер Шөлкеми Раўажланыў бағдарламасының Өзбекстандағы ўәкилханасы тәрепинен жойбар ушын 270 мың АҚШ доллары муғдарында грант ажыратылды. Жойбар шеңберинде Өзбекстан Республикасы Экология ҳәм қоршаған орталықты қорғаў бойынша мәмлекетлик комитети менен БМШтың Раўажланыў бағдарламасы арасында жойбарды әмелге асырыўға жәрдем көрсетиў хызметлери келисимине қол қойысылды.
Өзбекстан Республикасы Министрлер Кабинетиниң 2022-жыл 30-ноябрьдеги “Бирлескен Миллетлер Шөлкеми Раўажланыў бағдарламасы ҳәм Глобал экологиялық фондының қатнасында “Арал теңизи бассейни ландшафтының жарамсыз жерлеринде турақлы турмысты тәмийинлеўди қоллап-қуўатлайтуғын тийкар сыпатында көллер, суў-батпақлы жерлер ҳәм жағалық бойындағы аймақларды сақлаў ҳәм басқарыў” жойбарын әмелге асырыўға байланыслы илажлар ҳаққында”ғы қарары тийкарында Қарақалпақстан Республикасы Министрлер Кеңеси ҳәм Бухара ўәлаяты ҳәкимлиги тәрепинен тийисли министрлик ҳәм шөлкемлер менен биргеликте жойбардың 2022-2026–жылларға мөлшерленген илажлар режеси ислеп шығылмақта.
Қарақалпақстан хабар агентлиги