Мойнақ районында Жаслар ислери агентлигиниң районлық бөлими тәрепинен әскерий хызметкерлер арасында «Зәкаўат» интеллектуаллық беллесиўи өткерилди.
Әскерий-ўатансүйиўшилик айлығы шеңберинде өткерилген беллесиўде райондағы Айрықша жағдайлар, Ишки ислер бөлимлериниң хызметкерлери, тәбиятты қорғаў батальоны әскерлери, миллий гвардия ҳәм қорғаныў ислери бөлими хызметкерлеринен дүзилген топарлар беллести.
Беллесиўде алты ағзадан ибарат ҳәр бир топар елимиз сиясаты, әдебият, тарийхқа байланыслы, сондай-ақ, қызықлы ҳәм логикалық сораўлар шеңбериндеги жуўаплары менен өзлериниң қай дәрежеде билимдан, тапқыр ҳәм шаққан екенлигин көрсетти. Жуўаплар төрешилер қурамы тәрепинен баҳалап барылды.
-Топарлардың ағзалары өзлери таңлаған конвертлердеги алдыннан таярланған сораўлардың ҳәр бирине жуўап бериўи ушын бир минуттан ўақыт ажыратылды, -дейди Мойнақ районы Жаслар ислер агентлиги бөлиминиң баслығы Парахат Өмирзақов. -Қатнасыўшылар дурыс ҳәм тез жуўап берип, өзлериниң билимли екенлигин көрсетти.
Қызықлы өткен беллесиўдиң нәтийжелерине бола, ең жоқары нәтийжеге ерискен Айрықша жағдайлар бөлиминиң топары биринши орынды қолға киргизди.
Жеңимпазлар диплом ҳәм естелик саўғалары менен сыйлықланды.
Қарақалпақстан хабар агентлиги