Өзгерислер армия ҳәм халық арасындағы байланысты беккемлеўге қаратылған

14-январь – Ўатан қорғаўшылары күни мүнәсибети менен Арқа-Батыс әскерий округи, Өзбекстан журналистлери аўқамы Қарақалпақстан бөлими, Қарақалпақстан Республикасы Қорғаныў ислери басқармасы менен биргеликте ғалаба хабар қуралларының ўәкиллери ҳәм блогерлер ушын пресс-тур шөлкемлестирилди.

Пресс-тур қатнасыўшылары қорғаныў ислери басқармасының жаңа имараты, мүддетли әскерлер ушын мобилизациялық шақырыў резерви батальоны ҳәм Қорғаныў ислери басқармасы жанындағы Шақырылыўшыларды әскерий-техникалық қәнигеликлер бойынша таярлаў орайы ушын жаратылған шараятлар менен танысып, Қорғаныў ислери басқармасының баслығы полковник И.Рахимов ҳәм қәнигелер тәрепинен керекли мағлыўматлар берилди.

Соңғы жылларда әскерий тараўға қаратылып атырған итибар себепли бүгинги күнде елимизде жүзден аслам әскерий объектлердиң, дала-оқыў майданларының инфраструктурасы пүткиллей жаңа көриниске ийе болмақта.

2024-жылда Қарақалпақстан Республикасы әскерий-админстративлик секторы тәрепинен гезектеги объект – Қарақалпақстан Республикасы Қорғаныў ислери басқармасының жаңадан қурылған имаратының пайдаланыўға тапсырылыўы буның айқын мысалы болып есапланады.

Атап өтилгениндей, бул имарат мәмлекетимиздиң қорғаныў қүдиретин арттырыўға хызмет етип, ең таңлап алынған қарақалпақстанлы жасларды армия қатарына таярлаўға жәрдем берип, халқымыз ҳәм армиямыз арасында беккем көпир ўазыйпасын атқармақта.

Заманагөй дизайнға тийкарланып қурылған ҳәм халыққа хызмет көрсетиў ушын барлық қолайлықларға ийе болған бул имаратта нәўбетшиликти өтеў ушын хана, басқарыў пункти, архив, физикалық ҳәм юридикалық тәреплерди қабыллаў ушын арнаўлы орын, шақырылыўшылар ҳәм есапта турыўшылар туўралы электрон мағлыўматлар базасын жүргизиў ханасы және 30 бөлме мебель, «қыс-жаз» системасында ислейтуғын суўытыў ҳәм ысытыў системалары, компьютер топламлары ҳәм басқа да керекли үкенелер менен тәмийинленген.

Буның барлығы әскерий кәсиптиң абырайын арттырыў, әскерий хызметкерлерге қолайлы ҳәм қәўипсиз хызмет шараятларын жаратыўға қаратылғаны менен әҳмийетли.

Әмелге асырылып атырған өзгерислер менен жаңаланыўлар мәмлекеттиң қорғаныў потенциалын арттырыў, халқымыздың армияға болған жоқары исенимин күшейтиў, армия ҳәм халық арасындағы байланысты беккемлеўге хызмет етпекте.

Алдағы ўақытлары мәмлекеттиң қорғаныўы ушын кадрлар резервин таярлайтуғын, жасларда ўатансүйиўшилик, ана Ўатанға муҳаббат сезимлерин арттыратуғын, басланғыш әскерий таярлықтан сабақ беретуғын мобилизациялық шақырыў резерви батальоны ҳәм Қарақалпақстан Республикасы Қорғаныў ислери басқармасы жанындағы Шақырылыўшыларды әскерий-техникалық қәнигеликлер бойынша таярлаў орайы ушын барлық шараятлар жаратылды.

Қарақалпақстан Республикасы Қорғаныў ислери басқармасы ҳәм басқарма жанындағы мобилизациялық пункт, Шықырылыўшыларды әскерий-техникалық қәнигеликлер бойынша таярлаў орайының бир жерде болыўы, жасларды әскерий ўатансүйиўшилик руўхында тәрбиялаў, армияға шақырыў илажларын сапалы өткериў ушын барлық шараятларды жаратыў ҳәм әскерий таярлық оқыў-шынығыўларын өткериўдиң сапасын арттырыў бойынша Президентимиз тәрепинен берилген тапсырмаларды орынлаў мақсетинде “Қарақалпақстан тәжирийбеси” сыпатында жаңа системаның нәтийжели болғанлығын көрсетпекте.

Комплексте мобилизациялық шақырыў резерви батальоны хызметкерлериниң жаўынгерлик ҳәм руўхый-ағартыўшылық оқыў-шынығыўлары менен шуғылланыўы ушын айрықша үш қабатлы оқыў имараты қурылып, онда 20 ға шамалас оқыў ханасы, Әмир Темур ҳәм Жалаладдин Мәңгиберди үгитлери, тематикалық класслар, 120 орынлық әнжуманлар залы, көркем әдебият, оқыў қолланбалар ҳәм электрон баспаларға ийе китапхана, интернет тармағына байланысқан компьютер класы, компьютерлестирилген панорамалы оқ атыў класы, заманагөй спорт үскенелери ҳәм жабық түрдеги залға ийе болған спорт комплекси және медициналық пункт бүгинги күн талаплары тийкарында үскенеленген.

Бөлек жайласқан төрт қабатлы штаб имаратында батальон басқарыўы ушын нәўбетшилик ханасы, хызмет бөлмелери ҳәм санитар системаларға ийе болған 400 орынлық жатақхана қурылды.

Сап таярлығы шынығыўлары, әскерий дәстүрлерге тийкарланған салтанатлы илажларды өткериў ушын сап майданы, 400 орынға арналған ҳәм аутсорсинг системасы тийкарында жумыс ислейтуғын асхана комплекси, қосымша 200 орынлық үлкен санитар система қурылды.