Усы жылдың 11-июнь күни спорттың футбол түри бойынша Қарақалпақстан XXIX миллий чемпионатына старт берилди. Бундай үлкен турнир Қарақалпақстан Республикасы Спортты раўажландырыў министрлиги ҳәм Қарақалпақстан футбол ассоциациясы, бир қатар шөлкемлер тәрепинен өткерилмекте.
Бул чемпионатқа барлық район, қала ҳәм Жоқары оқыў орынлары менен басқа да командалар қатнаса алады. Онда биринши ҳәм екинши орынды алған командалар жарыстың кейинги 1/8, 1/4, 1/2 ҳәм финал басқышларына жоллама алады. Яғный, ойынлар олимпиада системасында өткериледи.
Миллий чемпионаттың биринши ойынында ҚМУ ҳәм БОФА футбол командалары өз-ара беллести. Тең гүреслер, тартысыўлар менен өткен ойында көбирек үстинлик Университет командасында болды. Ойынның дәслепки минутларында Хожабек Базарбаев қарсылас командаға гол урды. 1-таймның орталарына келип және сол ойыншы екинши голын урыўға еристи. 2-таймның дәслепки минутлары және де қызықлы болып өтти ҳәм университет футбол командасы қарсылас дәрўазаға қарай 4 гол урды. Бул голларға, А.Ажванбетов, П.Султамуратов, А.Сабуровлар ийелик етти. БОФА командасы қарсылас командаға бир гол менен жуўап бере алды. Ушырасыўдың қалған минутларында бул есап өзгермеди.
Еслетип өтемиз, бул үлкен турнир усы жылдың сентябрь айына шекем даўам етеди ҳәм 1,2,3-орынларды ийелеген командалар медаль, кубок, диплом ҳәм қымбат баҳалы саўғалар менен сыйлықланады.
Азизбек Дабылов,
ҚМУдың Интернет журналистикасы тәлим бағдарының 3-курс студенти.
Қарақалпақстан хабар агентлиги
Автордың түсирген фотолары