6-8-май күнлери аралығында Нөкис Олимпия резервлери колледжи спорт залында миллий гүрес бойынша 2004-2005-жылы туўылған Жас өспиримлер ҳәм қызлар арасында Өзбекстан чемпионатыныӊ ашылыў мәресими болып өтти.
Онда ер балалар арасында ер балалар 66 салмақта Ташкент қаласынан Дилшодбек Эшмаматов финалда бухаралы Диёр Файзуллаевты жеңип 1-орынды ийелеген болса, 3-орын бизиң республикамыз ӯәкили Өткир Уразалиев ҳәм Самарқанд ӯәлаятынан Шахруз Эшқабуловқа несип етти. 73-81- кг салмақларда болса, хорезмли Диёр Мадрахимов ҳәм бухаралы Султанбек Абдушукуровлар 1-орынды ийелеп, жоқары оқыӯ орынларына имтихансыз кириӯ жолламасын қолға киргизди.
90-100 ҳәм 100 кг нан аслам салмақта өз-ара гүрес алып барды. Бул салмақ категорияларында тийкарынан Ташкент қаласы, Самарқанд, Бухара, Қашқадәрья ҳәм Хорезм ӯәлаятларының палӯанлары чемпионлық ушын қурға түсти ҳәм 90 ҳәм +100 кг да Ташкент қаласынан Фаррух Мадартов, Махмуд Махсудовлар, 100 кг да Бегамбек Омановлар барлық қарсыласларын жеңип шығыӯға миясар болды.
Ал, қызлар арасында болса, , 57 кг салмақта Наӯайы ӯәлаятынан Сабина Асланова, 63 кг салмақта қашқадәрьялы Мухлиса Турдыбаева, 70 кг салмақта бухаралы Гүлшад Фармоновалар алтын медалды жеңип алды. 63 кг салмақта финалға шекем жетип келген бизиң республикамыз спортшысы Азада Медетбаева 2-орынды алған болса, 70 кг салмақта Асал Жалғасбаева 3-орынға несип етти.
Қарақалпақстанлы қызлар чемпионаттыӊ еӊ аўыр салмақ категорияларында табыслы қатнасты. Атап айтқанда, 78 кг салмақта Лариса Төрениязова алтын медалды қолға киргизген болса, Махбуба Убайдуллаева екинши, Ләззат Тилепбергеновалар үшинши орынларды ийелеп спорт ықласбентлерин қуӯанышқа бөледи.
+78 салмақта және бир ўәкилимиз Шийрин Тохтарбаева хорезмли палӯанды жеӊип Өзбекстан чемпионы атағын алыӯға миясар болды. Усы салмақ категориясында қатнасқан және еки спортшымыз болса, чемпионаттың қола медалын қолға киргизди.
Бул спортшы қызларды жарысқа тренерлерден Жамшид Турабаев, Парахат Наўрызбаев, Қанаат Зәрипбаев, Шыӊғыс Бийимбетов, Нийетбай Жорабековлар таярлады.
Адилбай Оразов,
Қарақалпақстан хабар агентлиги шолыўшысы