Биласизми?
Экспресс тестларнинг бир неча хиллари мавжуд бўлиб, улардан бири бу инсон қонида вирус ёки вирусга нисбатан ҳосил бўлган антитаналарни аниқлашга мўлжалланган тестлардир.
Инновацион ривожланиш вазирлиги ҳузуридаги Илғор технологиялар маркази Биотехнология лаборатория мудири Дилбар Долимованинг сўзларига кўра, агар ушбу экспресс тест вирусга нисбатан ҳосил бўлган антитана миқдорини ўлчашга қаратилган бўлса, унда махсус нитроцеллюлоза қоғозга одамдаги IgM ҳамда IgG антитаналарини боғловчи анти-антитаналар кўндаланг чизиқ шаклида шимдирилган бўлади.
– Шунингдек, олтин билан нишонланган вируснинг антитаналари конъюгацион қоғозга шимдирилган бўлади, – дейди Д.Долимова. – Тестга қон томизилганда қондаги вирусга қарши ҳосил бўлган антитаналар конъюгацион қоғоздаги антигенларга бирикади ҳамда капиляр орқали ҳаракатланиб, мос равишда анти-IgM ёки анти-IgG линияга ёпишади ҳамда нишонланган антигенлар бир жойга йиғилганлиги сабабли ранг ҳосил бўлиши кузатилади.
Ҳудди шундай тестлардан бири бу вирус антигенини аниқлаш учун мўлжалланган тестлар бўлиб, ушбу экспресс тест турида вирус антигенини таниб боғланувчи махсус антитаналар конъюгацион қоғозга шимдирилган бўлади. Бу усулда тест олиб бориш бурун-оғиз намунаси учун мос келади.
Айни вақтдаги тескари транскриптазага асосланган ПЗР усулида вирус РНКси бурун-оғиз намунасидан ажратиб олинади ҳамда вирус РНКсидан тескари транскрипция усулида ДНК нусхаси олинади ва вирусга хос бўлган нуклеотид кетма-кетлик аниқланади.
ЎзА