Қорақалпоғистонда тест синовлари Нукус шаҳридаги “Турон” марказий стадиони, Қорақалпоғистон Республикаси болалар ва ўсмирлар футбол академияси стадиони ҳамда Республика ўйин турлари ва енгил атлетика бўйича болалар ва ўсмирлар спорт мактабининг теннис кортида бошланди.
Тест синовларига киришдан олдин ҳар бир абитуриентга тиббий ниқоб ва қўлқоп, қалам, 0,5 литр сиғимликдаги ичимлик суви берилди.
Тест синовларининг адолатли ўтишини таъминлаш мақсадида 360 градуслик радиусга эга видеоназорат камералари ўрнатилди.
Янги ўқув йили учун Қорақалпоғистон Республикасида 82 минг 397 абитуриент онлайн рўйхатга олинган бўлиб, шундан 70 минг 482 абитуриент тест синовларига қатнашиши, 11 минг 915 абитуриент эса ижодий имтиҳонлар асосида билимларини синовдан ўтказиши кутилмоқда, − деди Давлат тест марказининг Қорақалпоғистон Республикасидаги бўлими бошлиғи Музаффар Абдуллаев.
– Тест синовлари ўтказиладиган “Турон” марказий стадионида 2 сектор бўлиб, ҳар бир секторда 900 нафардан 1 сменанинг ўзида 1800 абитуриент тест топширади, Қорақалпоғистон Республикаси болалар ва ўсмирлар футбол академияси стадионида эса 780 ва Республика ўйин турлари ва енгил атлетика бўйича болалар ва ўсмирлар спорт мактабининг теннис кортида 420 абитуриент тест топшириши учун шароитлар яратилган. Ҳар бир абитуриент учун 6 квадрат метрлик жой ажратилган.
Соат 8:00 да бошланган тест синовлари 11:00 да тугади. Кўпчилик абитуриентлар соат 10:00 гача тест саволларини ечиб чиқди.
– Саволлар мураккаб эмас. Химия ва математика фанларидан тест топширдим. Мен учун 2 соат вақт бемалол етди. Барча саволлар мактабда ўқиган дарсликлардан тайёрланган. Об-ҳаво ҳам яхши бўлди, – деди Мўйноқ туманидан келган абитуриент Жеткер Байниязов
.
Туман ҳокимликлари ташаббуси билан тест синовлари ўтказилиши муносабати билан абитуриентлар учун автобуслар қатнови йўлга қўйилди.
Қорақалпоғистонда тест синовлари жараёнларини 12 кунда якунлаш режалаштирилган.
Е.Қаноатов, ЎзА