Ўзбекистон кубоги мамлакатимиз футбол жамоалари учун Осиё чемпионлар лигасида иштирок этиш ҳуқуқини берадиган икки мусобақадан биридир. Шу боис уни қўлга киритиш йўлидаги кураш ҳамиша қизғин ва муросасиз бўлади.
Бу йилги Ўзбекистон кубоги финалида Тошкентнинг икки клуби – “Бунёдкор” ва “Локомотив” жамоалари ўзаро куч синашди. Пойтахтимиздаги “Бунёдкор” стадионида ўтган учрашувнинг еттинчи дақиқасида Марат Бикмаев жарима майдонидан зарба йўллаб, рақиб дарвозасини ишғол қилди – 1:0. Ушбу ҳисоб ўйиннинг сўнгги дақиқаларигача сақланиб қолди ва «Локомотив» ғалабага эришди.
Шу тариқа «Локомотив» жамоаси учинчи маротаба Ўзбекистон кубоги соҳибига айланди.
Жавоҳир Тошхўжаев, Муҳаммад Амин (сурат), ЎзА