“Bloomberg” агентлиги ёзишича, Apple компанияси ўз тарихида энг йирик ҳисобланган ва 10 йилдан буён яратилаётган электромобил лойиҳасини тўхтатишга қарор қилган. Компания мазкур ташаббус (Project Titan)ни ҳеч қачон ошкор этмаган. Тахминга кўра, лойиҳага жалб қилинган икки минг кишидан иборат “Special Projects Group” жамоасининг бир қисми энди сунъий интеллект ишланмаси билан шуғулланаётган бўлимга ўтказилади.

Бундай қарор бош амалиёт директори Жефф Уильямс ва вице-президент Кевин Линч томонидан қабул қилинган. Компания эса ушбу маълумотга изоҳ бермаган.