Қўшма Штатлар БМТ Хавфсизлик Кенгашида “янги овоз”, “янги фикр” зарур деб ҳисоблаб, тузилмани ислоҳ қилишга интилади. Бу ҳақда Жо Байден Бош Aссамблеянинг 78-сессияси минбарида сўзлаган нутқида айтиб ўтди.
“Ўтган йил ҳам шу ерда қилган нутқимда Қўшма Штатлар Хавфсизлик кенгашининг кенгайиши, доимий ва муваққат аъзолари сони кўпайтирилишини қўллаб-қувватлашини эълон қилгандим”, деди Президент.
Унинг сўзларига кўра, Қўшма Штатлар БМТга аъзо кўплаб давлатлар билан бу борада жиддий маслаҳатлашув ўтказган.
– Биз ислоҳотларга ҳисса қўшишда давом этамиз, – деди Aмерика раҳбари. – Кўпинча тараққиётга, кенгаш доирасида консенсусга қаршилик қиладиган тўсиқларни енгишимиз керак. Бизга кўпроқ овоз, кўпроқ фикр керак.