Президентимизнинг жорий йил 24 августда “Чорвачиликда идентификация қилиш тизими ва наслчилик соҳасини такомиллаштиришга оид қўшимча чора-тадбирлар тўғрисида”ги қарори қабул қилинди
Қарорга кўра, Ўзбекистонда ҳайвонларни идентификация қилиш, рўйхатга олиш ва кузатиш тизими 2 босқичда жорий қилинади. Биринчи босқичда 2023–2024 йилларда чорвачиликка ихтисослаштирилган 25 та туманда. Ушбу туманларда ҳайвонларни идентификация қилиш, рўйхатга олиш ва кузатиш тизимини жорий қилиш бепул амалга оширилади. Иккинчиси 2025–2026 йилларда республиканинг қолган туманларида жорий этилади.
Ветеринария ва чорвачиликни ривожлантириш қўмитаси соҳада масъул орган ҳисобланади. Қарор билан қўмита ҳузурида давлат муассасаси шаклида Ҳайвонларни идентификация қилиш, рўйхатга олиш ва кузатиш маркази ташкил этилади. Шунингдек, 25 та туманда чорвачилик кластерлари ташкил этилади.
Хусусан, Гўшт ва сут маҳсулотларини етиштириш, шунингдек, аҳолидан йиғиб олиш, қайта ишлаш ва тайёр маҳсулот шаклида реализация қилиш кластерлари ташкил этилади. Шу билан бирга тайёр озуқа ем маҳсулотларини ишлаб чиқариш ва уларни аҳолига қулай бўлган ҳудудларда сотиш шохобчаларини ташкил этиш кластерлари ташкил этилади.
Аҳоли хонадонларига маҳсулдор наслли молларни етказиб бериш, чорва молларини сўйиш кушхоналари, териларни қабул қилиш ва қайта ишлаш қувватларини ишга тушириш, терини қайта ишловчи корхоналар билан биргаликда кооперация асосида теридан тайёр маҳсулотларни ишлаб чиқариш кластерлари йўлга қўйилади.
Шунга кўра, ташкил этиладиган чорвачилик кластерларига 60 миллион АҚШ доллари миқдорида кредитлар ажратилади. Пахта ва ғалла экин майдонларини қисқартириш ҳисобига ҳар бир туманда камида 100–150 гектар майдон озуқабоп экинлар экиш учун ажратилади. 2023 йил 1 декабрдан чорвачилик хўжаликлари ўз эҳтиёжи учун импорт қилган наслдор қорамолларга ҳисобланган қўшилган қиймат солиғини қўмита кафолати асосида 180 кун ичида тўлаб бериш тизими жорий этилади. 2023 йил 1 сентябрдан 2025 йил 31 декабргача давлат томонидан қуйидаги тартибда субсидия ажратилади.
Чорвачилик маҳсулотлари етиштирувчи хўжаликларга хорижий давлатлардан импорт қилинган наслдор қорамолнинг ҳар бир бошига 2 миллион сўм, наслдор қўй ва эчкининг ҳар бир бошига 400 минг сўм миқдорида, паррандачилик хўжаликларига ҳар бир бош 1 кунлик наслдор жўжани импорт қилиш билан боғлиқ харажатларнинг 15 минг сўмини қоплаш учун субсидия ажратилади.
ЎзА