Хорватиянинг Сплит шаҳрида теннис бўйича ITF W40 Split Women турнирида иштирок этаётган ҳамюртимиз Нигина Абдураимова жуфтлик баҳсларида чорак финал йўлланмасини қўлга киритди.
Мамлакатимизнинг биринчи ракеткаси Нигина Абдураимова ва россиялик Алёна Фомина жуфтлиги мусобақанинг 1/8 финал беллашувида хорватиялик Яна Фетт ҳамда Ива Приморак билан рўбарў келди. Мураккаб кечган баҳсда 4/6, 6/4, тай-брекда 10/7 ҳисобида Нигина ва Алёна жуфтлиги ғалаба қозонди.
Энди Абдураимова/Фомина тандеми 1/4 финалда словениялик Ника Радишич ҳамда хорватиялик Тена Лукаш жуфтлигига қарши баҳсда кейинги босқич масаласини ҳал этади.
ЎзА