Ўзбекистон Ёзувчилар уюшмасида Тожик адабиёти кенгашининг йиллик ҳисобот йиғилиши бўлиб ўтди. Унда 2022 йилда тожик тилида нашр этилган китоблар, газета-журналларда чоп этилган туркумлар, шунингдек, адабий алоқалар ҳақида маърузалар тингланди. Амалга оширилган ишлар муҳокама қилинди.
Таъкидланганидек, кенгаш аъзолари йил давомида юртимизнинг адабий ҳаётида муҳим ўринга эга бўлган тадбирларда, адабий алоқаларнинг ривожланишига, миллатлараро тотувликни мустаҳкамлашга бағишланган турли илмий анжуманларда, ижодий учрашувлар ва давра суҳбатларида фаол иштирок этди. Кенгаш аъзолари ташаббуси билан 20 дан зиёд тожик тилидаги китоблар, 5 та таржима асар ҳамда “Шарқ дурдонаси” журналининг илк сонлари нашр этилди.
Шунингдек, “Замонавий тожик шеърияти антологияси” шоир ва таржимон Одил Икром таржимасида дунё юзини кўрди. Шоир Паймоннинг “Девон”и Ўзбекистон Ёзувчилар уюшмаси ҳомийлигида нашрдан чиқди. Республика Тожик миллий-маданий маркази билан ҳамкорликда тожик адабиётининг бугунги давр вакилларидан бир гуруҳининг асарлари эълон қилинди. Ўтган йилда адиблар шахсий ижодда ҳам фаол бўлди. Уларнинг асарлари китобхонлар томонидан севиб мутолаа қилинди.
Йиғилиш иштирокчилари ижодкорларга берилган имкониятлар ҳақида сўз юритиб, жорий йилда янги режалар асосида ишлашга, адабий алоқаларни янада мустаҳкамлашга келишиб олди.
ЎзА