“Ал-Жазира” ёзишича, Украина Президенти Владимир Зеленский Россия янги гипер товушли ракетадан фойдаланганини қоралади, Кремль эса бу Ғарбни огоҳлантириш, деди.

Президент Владимир Путин Россия ўзининг янги “Орешник” гипер товушли ракетасини жанговар усулда синовдан ўтказиш давом этишини билдириб, бундай аслаҳадан фойдаланиш учун тайёр захира мавжудлигини ҳам таъкидлаган.Ўз навбатида Украина ушбу қуролга қарши курашувчи самолёт тизими яратиш устида иш олиб бораётганини айтди.

Путиннинг баёноти жума куни, Россия янги ўрта масофага мўлжалланган воситасини Украинага биринчи марта йўналтирганидан бир кун ўтиб янгради. Унинг сўзларига кўра, бу ҳаракатга Украина Россияга зарба бериш учун АҚШ баллистик ва Британия қанотли ракеталаридан фойдаланиши сабаб бўлган.

Президент Владимир Зеленский Киев Ғарбдаги ҳамкорлар билан бирга “янги хавфларга” қарши туриш тизимини ишлаб чиқишни режалаштираётгани хусусида ҳам гапирган.

Путин илк синов муваффақиятли кечганини қайд этиб, кейинроқ яна тажриба ўтказилишини қўшимча қилган:

– Бундай синовни, жумладан, жанговар шароитда ҳам вазият ва Россия учун туғилаётган хавф ва таҳдидлар хусусиятига қараб давом эттирамиз. Зеро, бизда муайян маҳсулот захираси, фойдаланишга тайёр тизимлар мавжуд.

Айни изоҳ Украина парламенти Россиянинг пойтахтга ракета ҳужуми хавфини рўкач қилиб, ўз мажлисини бекор қилгандан бир неча соат ўтиб ошкор қилинди. Парламент ёпилиши бир неча хорижий элчихона Киевга ҳужум таҳдиди туфайли вақтинча фаолиятини тўхтатиш тўғрисида қарор қабул қилиши ортидан содир бўлди.

– Шунингдек, муайян ҳудуддаги барча тижорий тузилма, идора ва жамоат ташкилотлари ишини чеклаш бўйича тавсия берилди, маҳаллий аҳоли хавф кучайишидан огоҳлантирилди, – деди депутат Никита Потураев.

Парламентнинг яна бир аъзоси Алексей Гончаренко эса бу қарорни “бемаънилик” дея баҳолаб, мазкур баёнот Киевда “баттар ваҳима келтириб чиқарди” деди.

Зеленскийнинг матбуот котиби журналистларга Президент девони одатдаги тартибда ишлаётганини таъкидлади.

Пайшанба куни Путин Киев жорий ҳафта Россиядаги нишонларга қарата АҚШ ва Британияда ишлаб чиқарилган замонавий ракеталар йўналтирганига жавобан, Россия қўшини Украинага ўрта масофага учувчи янги баллистик ракета учирганини билдирди. Эртасига бу ҳақда Кремль қуйидагича муносабат билдирди:

– Марказий Днепр шаҳрига янги ишлаб чиқарилган гипер товушли баллистик ракета учирилиши Россиянинг Ғарбга нисбатан “ўйламасдан қилинган ҳаракатга жавоб” сифатидаги огоҳлантиришдир.

Матбуот котиби Дмитрий Песковнинг сўзларига кўра, Россия Қўшма Штатларни огоҳлантиришга мажбур эмас эди, шундай бўлса-да, муайян қарор “Орешник” ракетаси учирилишидан 30 дақиқа олдин эълон қилинган.

– 15 дақиқа давомида учган ракетанинг энг юқори тезлиги 11 Мах (1 мах – 1225,1 км/соат)ни ташкил этди, – деди Украина разведка агентлиги. – Ракета ҳар бири олтитадан ўқ-дори билан жиҳозланган олтита жанговар каллакка эга.

Песков АҚШ Президенти Жо Байден “эскалация”ни афзал кўрганига қарамай, Путин у билан очиқ мулоқотга тайёрлигини таъкидлади.

АҚШ ўзининг узоқ масофали армия тактик ракета тизими (ATACMS)дан Украина Россия ҳудудига чуқур зарба бериш учун фойдаланишини маъқуллади. Зеленский ҳам жума куни кечқурун ўз видео мурожаатида Россия янги ракетадан фойдаланганини эскалация сифатида баҳолади:

– Мудофаа вазири аллақачон ҳамкорларимиз билан одамлар ҳаётини янги хавфлардан ҳимоя қила оладиган янги ҳаво мудофааси тизими ишлаб чиқиш юзасидан учрашувлар ўтказмоқда. Кимдир бошқа давлатлардан шунчаки эмас, балки террор акти орқали янги ракетани синовдан ўтказиш учун фойдалана бошласа, бу аниқ халқаро жиноятдир. Украиналиклар ҳушёр бўлишлари керак. Биз “Ўртоқ” Путин бизни қўрқитишда давом этишини англашимиз керак.
Сешанба куни НАТО сўнгги воқеаларни муҳокама қилиш учун Украина билан фавқулодда йиғилиш ўтказади.

М.Пирматова тайёрлади.

ЎзА