Ижтимоий тармоқларда Нукус шаҳридаги марказий деҳқон бозори ёнидаги савдо мажмуасида ижара нархининг кўтарилишидан норози бўлган тадбиркорлар автомобиль йўлини тўсиб қўйгани ҳақида хабарлар тарқалган эди.
Ушбу ишни содир этган қилганликда гумонланган шахсларнинг иши Жиноят ишлари бўйича Нукус шаҳар судида кўриб чиқилди.
Қорақалпоғистон ИИВ матбуот хизмати ушбу воқеадан кейин фуқароларни митинг ва кўча юришлари қонун билан тақиқлангани ҳақида огоҳлантирди.
Айтиб ўтиш керакки, ушбу ҳолат “Nukus dilisha” масъулияти чекланган жамиятига қарашли уч қаватли савдо биносида ижара асосида фаолият юритувчи тадбиркорлар томонидан содир этилган.
Манбаларга кўра, дўконларнинг ижара пули сўнгги 3−4 ой ичида кўтарилган. Яқинда эса ижарачиларга ижара пули яна 1 миллион сўмга кўтарилиши маълум қилинган. Хусусан, иккинчи қаватда 2−3 миллион сўмга ижарада турувчи тадбиркорлар келаси ойдан бошлаб ижара учун 3−4 миллион сўмдан тўлашлари керак бўлган. Натижада ижарачи тадбиркорлардан тахминан 50 нафари норозилигини билдириш учун бозор ёнидаги йўлни тўсган.
Қорақалпоғистон Республикаси Ички ишлар вазирлиги ушбу вазиятни жамоат тартибини бузиш, деб атаганди.
Суд қарорига кўра, Нукус шаҳрида яшовчи Т.Ш, М.Т ва Ж.С.ларга нисбатан МЖтКнинг 201-моддасига мувофиқ, йиғилишлар, митинглар, кўча юришлари ёки намойишлар уюштириш, ўтказиш тартибини бузгани учун ҳар бирига 15 сутка маъмурий қамоққа олиш жазоси тайинланган.
ЎзА