Олий Мажлис Сенати Фан, таълим ва соғлиқни сақлаш масалалари қўмитасининг ишчи гуруҳи йиғилиши бўлиб ўтди.
Тадбирда Олий Мажлис Сенати аъзолари, Қонунчилик палатаси депутатлари, соҳага оид вазирлик, идоралар, ҳўжалик юритувчи субъектлар вакиллари иштирок этди.
Иштирокчилар Олий Мажлис Қонунчилик палатаси томонидан киритилган “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги Ўзбекистон Республикаси қонунини дастлабки тарзда муҳокама қилди.
Қайд этилганидек, Қонун алкоголь ва тамаки маҳсулотларининг тарқатилишини ҳамда истеъмол қилинишини чеклаш соҳасидаги муносабатларни тартибга солиш мақсадида ишлаб чиқилган. Ҳужжат фуқароларнинг, энг аввало, йигирма бир ёшга тўлмаган шахсларнинг соғлиғини алкоголь ва тамаки маҳсулотларини истеъмол қилишнинг зарарли таъсиридан, бу билан боғлиқ ижтимоий ва бошқа салбий оқибатлардан ҳимоя қилишга, шунингдек, жамиятда соғлом турмуш тарзини шакллантириш ҳамда қарор топтириш учун ташкилий ва ҳуқуқий шарт-шароитларни яратишга қаратилган.
Йиғилишда Қонун билан киритилаётган янги нормаларга нисбатан берилган таклифлар ҳам муҳокама этилди. Хусусан, ҳужжатнинг Тамаки маҳсулотларининг, тамакини ҳамда никотинни истеъмол қилиш мосламаларининг айланиши тўғрисидаги моддасида чекилмайдиган тамаки маҳсулотларини, шу жумладан, таркибида никотин мавжуд бўлган чекилмайдиган маҳсулотларни Ўзбекистон Республикасига олиб кириш (шу жумладан, халқаро почта ва курьерлик жўнатмалари орқали олиб кириш) ҳамда Ўзбекистон Республикаси ҳудудида реализация қилиш тақиқланиши белгиланган.
Республика ҳудудида фаолият юритувчи “УЗБАТ А.О.” қўшма корхонаси мазкур норма инвестиция лойиҳасига таъсири тўғрисида фикр ва таклифлар билдирди.
Иштирокчилар Қонун юзасидан билдирилган таклиф ва мулоҳазаларни инобатга олган ҳолда, ҳужжатни такомиллаштириш лозимлигини таъкидлади.
ЎзА