Ўзбекистон Республикаси Олий Мажлиси Сенатининг йигирма учинчи ялпи мажлиси ўз ишини бошлади. Ялпи мажлисни Сенат Раиси Танзила Норбоева очиб берди.
Мажлисда дастлаб Сенат қўмиталарининг 2021 йилги фаолияти сарҳисоб қилинди. Сенат Раиси ўтган йилги фаолият ҳақида тўхталар экан, танқидий-таҳлилий ёндашди.
Жойлардаги айрим сенаторлар ўзлари мансуб қўмиталардан узилиб қолаётгани, ҳудудлардаги муаммоларни парламентга кўтариб чиқишда сусткашликка йўл қўяётгани таъкидланди. Фаолият давомида парламент назорати институтидан самарали фойдаланиш, ҳар жабҳада очиқлик ва шаффофликни таъминлаш муҳимлигига эътибор қаратиш лозимлиги айтилди.
Сенат раиси Танзила Норбоева ҳудудлардаги сенаторлар халқ депутатлари маҳаллий Кенгашлар билан ҳамкорликни йўлга қўйиши, мажлисбозликни камайтириб, амалий ишларга ўтиши зарурлигини қайд этди. Сенат қўмиталари ва сенаторлар маҳаллий Кенгашлар депутатлари ҳамда доимий комиссиялари билан ҳамкорликни кучайтириб, жойлардаги муаммоларни ҳал этишда ташаббускор бўлиши лозимлигини таъкидлади.
Олий Мажлис Сенатининг йигирма учинчи ялпи мажлиси давом этмоқда.
Муҳтарама Комилова, ЎзА