Ўзбекистон Республикаси Президентининг жорий йил 28 январдаги “2022-2026 йилларга мўлжалланган Янги Ўзбекистоннинг тараққиёт стратегияси тўғрисида”ги фармонида “Давлат – инсон учун” деган эзгу ғояни ҳаётга татбиқ этиш кўзда тутилган.

Мамлакатимизнинг кейинги 5 йилга мўлжалланган Тараққиёт стратегиясининг биринчи устувор йўналиши бўйича электрон давлат хизматларининг улушини амалдаги 54 фоиздан 100 фоизга етказиш мақсад қилинган. Бу билан ортиқча сарсонгарчиликларга чек қўйилади, фуқароларга қулайлик яратилади, қолаверса, жамоатчилик фикрини мунтазам ва илмий асосланган ҳолда тизимли ўрганиш йўлга қўйилади.

Мазкур ҳужжатда Социология институтини ташкил этиш белгиланган. Ушбу институтнинг масъулларидан бири, Иқтисодий тадқиқотлар ва ислоҳотлар маркази директори Обид Ҳакимов институтнинг вазифалари хусусида сўзлаб берди.

– Жамиятни қандай масалалар қийнаяпти, одамларнинг онги қандай ўзгаряпти, булар бизнинг энг асосий масалаларимиз. Бизга мана шу жиҳатларни доимий тадқиқот қилиш ва давлат сиёсатини шакллантиришда доимий алоқани ўрнатувчи институт керак. Бу бўйича давлатимиз раҳбари кенгайтирилган йиғилишда ҳам айтди ва ҳозирда ишлар бошлаб юборилган.

Жамоат фикрини ўрганиш базасида Ўзбекистон Республикасида биринчи марта Социология институти ташкил этилади. Бу институт амалга ошираётган ислоҳотларимизнинг одамларда қандай таассуротлар уйғотаётгани, улардан қандай қониқиш ҳосил қилаётганини ўрганади.

Шаҳноза Маматуропова, ЎзА