Қонун лойиҳаси билан болани парваришлаш даврини (6 йил) иш стажига қўшиб ҳисоблаш кўзда тутилмоқда. Бу ижтимоий ҳимояни кучайтиришга хизмат қилади.
Олий Мажлис Қонунчилик палатаси мажлисида иккинчи ўқишда кўриб чиқилган “Фуқароларнинг давлат пенсия таъминоти тўғрисида”ги Ўзбекистон Республикаси Қонунига ҳамда Ўзбекистон Республикасининг Меҳнат кодексига ўзгартиш ва қўшимчалар киритиш ҳақида”ги қонун лойиҳасига кўра, ногиронлиги болаликдан бўлган болаларга 18 ёшгача қараган даврини иш стажига қўшиб ҳисоблаш, болани парваришлаш вақтининг ҳаммасини жамланганда кўпи билан 6 йиллик даврни иш стажига қўшиб ҳисоблаш белгиланмоқда.
Шунингдек, қонун лойиҳасида республика ҳудудида карантинли ва инсон учун хавфли бўлган бошқа юқумли касалликлар тарқалиши таҳдиди мавжуд бўлган, амал қилиб турган даврда пенсия олиш ҳуқуқи вужудга келган фуқаролар, ушбу тадбирлар (чекловлар) даврида ёки тугагандан сўнг бир ой ичида пенсия тайинлашни сўраб мурожаат этган тақдирда, уларга пенсия уни олиш ҳуқуқи пайдо бўлган санадан тайинлаш таклиф этилмоқда.
Мажлисда қонун лойиҳасининг қабул қилиниши ижтимоий ҳимояни кучайтириш, етим болаларнинг ҳуқуқ ва эркинликларини рўёбга чиқариш, уларни давлат томонидан қўллаб-қувватлаш механизмларини янада такомиллаштиришга хизмат қилиши айтилиб, ушбу ҳужжат иккинчи ўқишда қабул қилинди.
Муҳтарама Комилова, ЎзА