Автомототранспорт воситалари электрон савдо платформаси орқали ижарага берилганда, шартномани нотариал тартибда тасдиқлаш талаби бекор қилиняпти. Бу каби шартномалар оддий ёзма шаклда тузилиши белгиланмоқда.
Бу тартиб Олий Мажлис Қонунчилик палатасининг навбатдаги мажлисида кўриб чиқилган “Ўзбекистон Республикаси Фуқаролик кодексининг 565-моддасига ўзгартиш ва қўшимча киритиш тўғрисида”ги қонун лойиҳасида ўз аксини топган.
Иккинчи ўқишда муҳокама қилинган мазкур ҳужжат бўйича Коррупцияга қарши курашиш ва суд-ҳуқуқ масалалари қўмитаси аъзоси Муҳаммад Валиев маълумот берар экан, қонун лойиҳасини иккинчи ўқишга тайёрлаш жараёнида тегишли мутасаддилар билан муҳокама қилингани ва таклифлар берилганини таъкидлади. Унинг қайд этишича, қонун лойиҳасининг қабул қилиниши автомототранспорт воситаларини ижарага бериш билан боғлиқ муносабатларни енгиллаштиради, ижара бозорини ривожлантиради.
Депутатларнинг моддама-модда овоз беришидан сўнг қонун лойиҳаси иккинчи ўқишда қабул қилинди.
Муҳтарама Комилова, ЎзА