13-15 март кунлари “Ўзэкспомарказ”да “Қишлоқ хўжалиги – AgroWorld Uzbekistan 2019” 14 – Халқаро кўргазмаси бўлиб ўтади. Кўргазмада жаҳоннинг 20 та мамлакатидан 150 та компания иштирок этади.
Экспонентлар чорвачилик, паррандачилик, иссиқхона хўжаликлари учун ускуналар ва технологияларни, ем-хашак ва дон саноати учун ечимларни тақдим этади.
Анъанага кўра, Ўзбекистон фермерлар, деҳқон хўжаликлари ва томорқа ер эгалари кенгаши кўмагида “Фермерлар куни” ўтказилади. Шу куни тажриба алмашиш ва кўргазмада тақдим этилган маҳсулотларнинг кенг турларини ишлаб чиқарувчи ва етказиб берувчи корхоналар билан бевосита мулоқот қилиш учун юртимизнинг барча вилоятларидан аграр соҳа мутахассислари келади.
Амалий дастур доирасида, 13 март куни “Жазирама иссиқ иқлим шароитида қандай қилиб кўп сут ва бузоқлар олиш мумкин?” мавзусидаги семинар ўтказилади.
Кўргазма илғор технологияларни жалб қилиш орқали агросаноат секторида халқаро ҳамкорликни янада ривожлантириш, тажриба алмашиш, ҳамда Ўзбекистоннинг қишлоқ хўжалиги соҳасининг инвестицион жозибадорлигини оширишга туртки бўлиб хизмат қилиши кутилмоқда.
Ўзбекистон Республикаси
Қишлоқ хўжалиги вазирлиги
Матбуот хизмати.
ЎзА