Олий Мажлис Қонунчилик палатаси мажлисида “Лицензиялаш, рухсат бериш ва хабардор қилиш тартиб-таомиллари тўғрисида”ги Ўзбекистон Республикаси Қонунига божхона брокери фаолиятини такомиллаштиришга қаратилган қўшимчалар киритиш ҳақида”ги қонун лойиҳаси иккинчи ўқишда моддама-модда кўриб чиқилди.
Мазкур қонун лойиҳаси билан “Лицензиялаш, рухсат бериш ва хабардор қилиш тартиб-таомиллари тўғрисида”ги қонунга ваколатли давлат органини божхона брокери фаолиятини ҳамда халқаро курьерлик жўнатмаларини етказиб бериш бўйича фаолиятни амалга оширишлари тўғрисида хабардор қилиш тартиби белгилаб берилмоқда. Шунингдек, ваколатли органни хабардор этмасдан фаолиятни амалга оширганлик, хабардор қилиш тартибида фаолият юритиш учун белгиланган талаблар ва шартларнинг бажарилгани юзасидан ваколатли органга ёлғон ёки нотўғри маълумотлар берганлик учун минимал жарима белгиланмоқда.
Қонун лойиҳасининг қабул қилиниши ташқи иқтисодий фаолият субъектларига божхона декларациялаши бўйича кўрсатиладиган хизматлар сифатини яхшилаш, божхона ва солиқ тўғрисидаги қонунчилик бузилишларининг олдини олиш, уларни аниқлаш ва уларга чек қўйишга хизмат қилади.
Мажлисда қонун лойиҳаси қабул қилинди.
Муҳтарама Комилова,
ЎзА