Пойтахтимизда “ИННОПРОМ. Марказий Осиё” халқаро саноат кўргазмасининг учинчи кунги тадбирлари бўлиб ўтмоқда.
Унда маҳаллий ва хорижлик ишлаб чиқарувчилар ўз маҳсулотларини намойиш этиш баробарида иштирокчиларни ҳамкорликка ҳам чорламоқда.
Биз ҳам фурсатдан фойдаланиб, иштирокчилардан интервью олдик.
Насиба АБДУҒАНИЕВА, “Ўзтўқимачиликсаноат” уюшмаси қошидаги Тўқимачилик маҳсулотлари рекламаси ва маркетинг агентлиги мутахассиси:
–“ИННОПРОМ. Марказий Осиё” халқаро саноат кўргазмаси уч кун мобайнида одамлар билан гавжум бўлди. Бу эса иштирокчиларнинг кўргазма экспозициясига бўлган катта қизиқишидан далолат беради. Биз ҳам ушбу кўргазманинг доимий иштирокчиларига айланиб улгурдик. Негаки, кейинги пайтда хориж компаниялари миллий тўқимачилик корхоналари билан ҳамкорлик ўрнатишга алоҳида аҳамият қаратмоқда.
Шу сабабли, бу гал ҳам уюшмага аъзо 10 дан зиёд корхона маҳсулотларини биз учун ажратилган стендга жамладик. Экспозициямиздан ип-калавадан тайёр кийим-кечакларгача ўрин олган. Кўргазманинг биринчи куниданоқ, стендимиз иштирокчилар билан гавжум бўлди. Уларга фаолиятимиз ҳақида батафсил маълумот бердик. Албатта, бундай қизиқиш эса яқин кунларда ўз натижасини беради.
Вероника ШАВЕЛЬ, Беларусь Республикасининг Инвестициялар ва хусусийлаштириш миллий агентлиги вакили:
– Ўзбекистонда ўтказилаётган “ИННОПРОМ. Марказий Осиё” халқаро саноат кўргазмаси барча иштирокчилар учун янги ғоя ва лойиҳаларни амалга оширишга туртки бўлмоқда. Шу боис ушбу намойиш чинакам мулоқот майдонига айланди. Биз ҳам ўз стендимиз билан кўргазмада қатнашяпмиз ва бошқа стендлар фаолияти билан ҳам танишишга улгурдик.
Ҳозирги кунда Беларусь ва Хитой давлатлари ҳамкорлигида саноат парки фаолият кўрсатади. Шунга қарамай, биз бу борадаги тажрибани янада бойитиш ва бундан ҳам кўпроқ саноат паркларини очиш ниятидамиз. Чунки нафақат резидентлар, балки сармоядорлар томонидан ҳам бунга бўлган юқори талабни кўряпмиз.
Айни пайтда юртимизда саноат паркларини яратиш бўйича лойиҳани амалга оширяпмиз. Ушбу синов лойиҳаси старт олди, яъни биз иккита майдончада қурилиш ишларини бошлаймиз. Юртингизга келишимиз ҳам бу каби ишларга боғлиқ бўлиб, ҳамкорлик қилишга рози бўладиган салоҳиятли ҳамкорларни топишни мақсад қилганмиз. Шу мақсадда биз ҳамкасбларимиз билан «Чирчиқ» кимё-индустриал технопаркида амалга оширилаётган ишлар билан яқиндан танишдик. У ердаги ишлаб чиқарувчиларнинг иш жараёнини ўргандик.
Юрий ПРАСЛОВ, Москвадаги “Коммерсант” нашриёт уйининг продюсерлик бўлими вакили:
– «Чирчиқ» кимё-индустриал технопаркидаги ишлаб чиқаришни маҳаллийлаштириш бўйича илғор тажрибалар билан танишдим. Ўйлайманки, Ўзбекистон Россия билан икки томонлама ҳамкорлик бўйича улкан истиқболларга эга. Бу нафақат биз ҳаммамиз қадрлайдиган, яхши кўрадиган туризм соҳасини, балки энергетика соҳаси, инновацион маҳсулотлар, жумладан, фармацевтика соҳасини ҳам қамраб олади.
Мен Россия делегацияси таркибида Петербург фармацевтика компаниялари вакилларини ҳам кўрдим. Шу билан бирга, томонлар ўртасида алюминий саноатида ҳам ҳамкорлик ривожланмоқда. Умид қиламанки, томонлар ўртасида энергетика соҳасидаги ҳамкорлик Ўзбекистоннинг саноат ренессанси учун кучли туртки беради. Чунки арзон ишлаб чиқариш учун арзон энергия керак ва ҳозир бутун дунёда у ёки бу манбаларнинг “яшиллик” даражаси ва улардан фойдаланиш ўртасида фарқ мавжуд бўлиб, юртингиз сингари серқуёш мамлакатда қуёш панелларининг бўлиши мантиқан тўғри. Шу нуқтаи назардан биз янги келишувларни интиқлик билан кутиб қоламиз.
ЎзА мухбири Насиба Зиёдуллаева ёзиб олди