Қонун лойиҳасига шарҳ
Бугунги кунда кўпчилик фуқаролар ўзлари яшаб турган уй-жойларининг кадастр ҳужжати йўқлиги ёки эгалик ҳуқуқига эга эмаслиги каби муаммоларга дуч келади. 2018 йилда Президентимизнинг тегишли фармонига мувофиқ ўтказилган бир марталик умумдавлат акцияси доирасида 621 минг нафардан ортиқ фуқароларнинг ўзбошимчалик билан эгалланган ер участкасида тегишли рухсатномасиз қурилган уй-жойларига нисбатан эгалик ҳуқуқи эътироф этилиб, уларга кадастр ҳужжатлари расмийлаштириб берилган эди. Шунга қарамасдан, бугунги кунга қадар 126 мингдан ортиқ фуқароларнинг рухсатномасиз қурилган уй-жойларга нисбатан эгаликни белгилаш масаласи қонуний ечимни кутмоқда.
Эндиликда мана шундай масалаларга оқилона ечим бўладиган ҳужжат – «Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида»ги қонун Олий Мажлис Қонунчилик палатасида қабул қилиниб, Сенатга юборилди.
Мазкур қонунда назарда тутилаётган тартиб-қоидалар ҳақида Қонунчилик палатасининг Аграр ва сув хўжалиги масалалари қўмитаси раиси Равшан Мамутов билан суҳбатлашдик.
Суҳбатимиз давомида ҳужжатсиз ер участкалари ва иншоотларни расмийлаштириш учун қаерга мурожаат қилиш керак, ўзбошимчалик билан эгалланган ер участкалари расмийлаштирилганда қанча тўлов тўланади, кимларга имтиёз берилади, жарима солинадими-йўқми, фуқароларнинг қанча ҳажмгача бўлган ер участкалари расмийлаштирилади, ушбу ҳужжат қандай ҳолатдаги участка ва уй-жойларга амал қилади, ота-бобосидан мерос қолган ҳужжатсиз ер ва уй-жойлар ҳам расмийлаштириладими ва бошқа шу каби саволларга жавоблар олинди.
Суҳбатнинг тўлиқ шакли билан YouTube ижтимоий тармоғи орқали танишишингиз мумкин.
Муҳтарама Комилова, Нишон Абдувоитов (видео), ЎзА