Аввал хабар қилганимиздек, Ўзбекистон экологик ҳаракати, Ўзбекистон Республикаси Ташқи ишлар вазирлиги, Инновацион ривожланиш вазирлиги, Фанлар Академияси ташкилотчилигида ўтказилаётган “Орол фожиаси оқибатларини юмшатиш бўйича ҳамкорликдаги ҳаракатлар: янгича ёндашувлар, инновацион ечимлар ва инвестициялар” мавзусидаги халқаро конференция қатнашчилари Мўйноққа етиб келди.
Меҳмонлар “Кемалар қабристони”да бўлиб, бу ерда бир вақтлар ҳаёт қанчалик гуллаб-яшнагани, бугун сувнинг қанчалар чекиниб, ўз ҳудудларини тарк этганини билиб олишди. Ҳудуддаги экологик вазият билан бевосита танишиш имконига эга бўлди.
– Оролда биринчи марта бўлишим, – дейди Покистон Ислом Республикасининг Ўзбекистондаги элчиси Ирфан Юсуф Шами. – Бироқ аввал ҳам унинг оқибатлари, бутун дунёдаги экологик муаммонинг аниқ кўриниши эканини эшитганман. Бир вақтлар дунёдаги бешта йирик денгизнинг бири бўлган Оролни кейинги йиллардаги тақдири бутун минтақага таъсир қилаётганини кузатиш мумкин. Бугун Покистондан шу соҳада фаолият юритаётган профессор, олимлар келишган. Улар албатта,Оролга кўмак бериш йўлини топишлари ва самарали лойиҳа таклиф қилишларига ишонаман. Бу борада Покистон албатта ёрдам қўлини чўзади.
Сайёра Шоева, Темур Мадаминов (сурат) ЎзА