Мамлакатимизда жорий йил 12-17 ноябрь кунлари илк бор Бутунжаҳон бокс иттифоқининг (WBC) йиллик конвенцияси ўтказилади.
Ўзбекистонда ўтказиладиган мазкур йирик профессионал бокс тадбирида WBC президенти Маурисио Сулейман, ушбу ташкилот Ижроия қўмитасининг 15 нафарга яқин аъзолари, Майк Тайсон, Холифилд, Константин Цзю, Тайсон Фьюри, Васий Ломаченко каби жаҳон чемпионлари, 200 га яқин давлатдан 300 нафарга яқин бокс ташкилотлари, промуотерлик компания вакиллари, мутасаддилари иштирок этиши кутилмоқда.
Бугун Ёшлар сиёсати ва спорт вазирлигида Бутунжаҳон бокс иттифоқининг йиллик 61-конвенциясига кўрилаётган тайёргарлик ишларига бағишланган йиғилиш бўлиб ўтди.
Ёшлар сиёсати ва спорт вазири Адҳам Икромов олиб борган йиғилишда таъкидланганидек, 1963 йилда асос солинган Бутунжаҳон бокс иттифоқи профессионал бокснинг энг нуфузли йўналиши ҳисобланиб, унинг бош қароргоҳи Мексиканинг Мехико шаҳрида жойлашган. Ўтган йили ташкилотнинг юбилей – 60-йиллик конвенцияси Мексикада ўтказилган ва айнан ўша тадбирда 61-конвенция мезбонлиги Ўзбекистонга ишониб топширилган. Бу эса мамлакатимиз ўтган йиллар давомида нуфузли спорт тадбирлари, чемпионатлар, халқаро турнирлар, анжуманлар марказига айланиб бораётганининг ёрқин ифодасидир.
Йиғилишда мазкур йирик бокс тадбирида қатнашиш учун юртимизга келаётган спортчилар, йирик спорт мутасаддиларини кутиб олиш жараёнлари, тадбирларни юқори савияда ўтказиш, ташкил этиладиган профессионал бокс кечасини юқори савияда уюштириш борасидаги ишлар муҳокама қилинди. Ташкилотларнинг мутасаддиларига аниқ вазифалар белгиланди.
Йиғилишда онлайн тарзда иштирок этган Самарқанд вилояти ҳокимлиги вакиллари юртимизга келаётган профессионал бокснинг номдор вакилларини Самарқандда кутиб олиш, қадимий ва ҳамиша навқирон шаҳарда ўтказиладиган тадбирлар хусусида ўз фикрларини билдирди.
Айтиш лозим, Бутунжаҳон бокс иттифоқининг тарихий йиғини пойтахтимизда ташкил этилаётгани, мазкур конвенцияда WВC тизимидаги бир қатор муҳим қарорлар Тошкентда қабул қилиниши ўзига хос аҳамият касб этиши шубҳасиз.
Дунё профессионал бокс юлдузлари Тошкентда жам бўлиши жаҳон бокс ихлосмандларининг эътиборини Тошкентга қаратади. Юртимизнинг халқаро спорт обрўсини жаҳон ҳамжамиятига ёйишига хизмат қилиши билан аҳамиятлидир.
Мазкур конвенция доирасида ўтказиладиган профессионал бокс мусобақаларида истеъдодли боксчиларимиз Баҳодир Жалолов, Абдумалик Халаков, Қудратилла Абдуқаҳҳоров, Миразизбек Мирзахалиловларнинг чет эллик рақиблари билан жанг ўтказиши нафақат минтақа, балки дунё бокс ихлосмандларининг катта қизиқишига сабаб бўлиши тайин.
Эслатиб ўтамиз, бугун тунда Бутунжаҳон бокс иттифоқининг йиллик конвенциясида иштирок этиш учун WBC президенти Маурисио Сулейман Тошкентга етиб келади. Таниқли боксчилардан Тайсон Фьюри, Василий Ломаченко, Константин Цзю каби номдорлар 12 ноябрда Тошкентга етиб келса, Майк Тайсон 16 ноябрь куни пойтахт аэропортида кутиб олиниши режалаштирилмоқда.
Тўлқин Рўзиев, ЎзА