Ғарб давлатлари адолатли муносабат билдирган тақдирда, Туркия, Европа Иттифоқига кириш учун қўйилган талабларга биноан, ислоҳотни жадаллаштиради. Мамлакатнинг ЕИдаги доимий вакили Фарук Қаймоқчи шу ҳақда баёнот берди.
– Энг муҳими, Туркияга бошқа номзод давлатлар билан тенг муносабат билдирилмоғи лозим, – деди у Анадолу агентлигига. – Шарт бажарилган тақдирда, Анқара ЕИга қўшилиш учун “ислоҳотни тезлаштиради”. Биз бошқа номзодлардан кўра, талаб этилган меъёрларни тезроқ амалга оширишимиз мумкин. Туркия ЕИга кириш учун энг муҳим номзод, аммо европалик сиёсатчилар бунга эътибор бермай келяпти.
Дипломат маълум қилишича, Туркия Президенти Режеп Таййип Эрдоған 25-26 октябрь кунлари Брюсселда ўтадиган ЕИнинг “Глобал портал” иқтисодий ташаббуслар форумига таклиф қилинган. Анжуман Еврокомиссия шафелигида ўтказилади.