– Ўзбекистон ва Туркияни узоқ масофа ажратиб турса-да, тарихий илдизи туташ, қадрият ва маданияти ўхшаш икки халқ қардошлиги жуда яқиндир. Шу боис, халқларимизнинг бир-бирига муҳаббати чексиз, доимо меҳр-оқибатли бўлиб келган. Икки давлат раҳбарларининг бевосита саъй-ҳаракати билан бу қутлуғ анъана кейинги йилларда янада мустаҳкамланиб бормоқда. Президент Шавкат Мирзиёев таклифига биноан Туркия Республикаси Президенти Режеп Таййип Эрдўғоннинг давлат ташрифи билан Ўзбекистонга келгани ҳам тарихий аҳил муносабатларимиз ривожига хизмат қилади, – дейди Ҳасан Улусой. – Алоҳида таъкидлашни истардимки, биз ота юртимизда фаолият қамровимизни кенгайтирганимиздан мамнунмиз. Ўзбекистондаги “Nobel Pharmsanoat” компаниясига 2002 йилда асос солинган. Мазкур компания Туркияда 1954 йилда фаолият бошлаган “Ulkar Holding” – “Nobel Ilac” компанияларининг йирик тармоғи ҳисобланади. “Nobel Pharmsanoat” 100 фоиз ўз сармоямиз ҳисобидан иш бошлаган Ўзбекистондаги дастлабки йирик фармацевтика соҳасидаги компаниядир.

Бугунги кунда “Nobel Pharmsanoat”да халқаро стандартларга тўла мос келадиган 100 дан зиёд кўринишда 60 турдаги дори-дармон маҳсулотлари ишлаб чиқарилади. Мазкур дори воситаларининг 5 тури маҳаллий хом ашёдан тайёрланмоқда.

Маҳсулотимиз сифати ва унинг таъсир механизмига алоҳида эътибор қаратамиз. Шу мақсадда юқори малакали ходимларимиз Ўзбекистоннинг барча ҳудудларида шифокорлар ва фармацевтлар билан мунтазам учрашувлар ўтказиб, маҳсулотларимиздан тўғри ва мақсадли фойдаланиш борасида маслаҳат бериб келади.

Инвестицияларимиз миқдори 40 миллион АҚШ долларига етган, “Nobel Pharmsanoat” компанияси маҳсулотларини экспорт қилиш имкониятини янада кучайтирадиган янги фабрика иш бошлаш арафасида. Инвестицияларимизнинг Ўзбекистон Республикаси Инвестиция дастуридан ўрин олган қисми 13,5 миллион доллардир. Ўзбекистон ҳукумати аъзоларининг 2017 йил март ойида Туркияга бўлган ташрифи чоғида эса яна 3 миллион долларлик янги инвестиция шартномаси имзоланди.

Янги фабрикамиз қурилиш-монтаж ишлари 2013 йилнинг 16 ноябрида бошланиб, 2017 йилнинг август ойида тугалланди. Бу ерда 60 дан ортиқ фаол моддадан иборат дори-дармонлар учун ишлаб чиқариш линиялари, физик ва кимёвий, микробиология лабораториялари, хом ашё, қадоқлаш ва тайёр маҳсулот омборлари мавжуд. Ишлаб чиқариш механизми Европа CMP стандартларига тўла мос келади. Яқин кунларда маҳсулот ишлаб чиқариш йўлга қўйилади.

Ишлаб чиқаришга Италия, Жанубий Корея, Туркия, Ҳиндистондан замонавий технологиялар жалб этилган. Бир сменада йилига 10 миллион қути дори ишлаб чиқариш қувватига эга ушбу фабрикада таблетка, қопламали таблетка, капсула, эритма кукуни, томчи спрей ва бурун учун назал спрей каби маҳсулотлар ишлаб чиқарилади. Шу билан бирга фабрикада ходимлар учун барча қулайликка эга замонавий офис ишга тушади.

Ўзбекистондаги “Nobel Pharmsanoat” компанияси «Made in Uzbekistan» бренди остида ўз маҳсулотларини Афғонистон, Грузия каби давлатларга экспорт қилмоқда. Яна 3 турдаги маҳсулотимиз Туркияда рўйхатдан ўтказилиб, апрель ойида уларнинг дастлабки қисми экспортга йўналтирилди. Ҳозир Германия ва Молдовага экспорт учун тайёргарлик кўрилмоқда.

Буюк ипак йўлининг савдо чорраҳасида жойлашган ота юртимиз – Ўзбекистонда инвестицияларимиз ҳажмини янада кўпайтириш тарафдоримиз. Фикримиз далили сифатида айтишим керакки, Ўзбекистон Республикаси Инвестиция дастури доирасида қўллаб-қувватланаётган лойиҳаларимизни амалга ошириш билан дори-дармон воситалари ишлаб чиқариш ҳажмини йилига 50 миллион қутига етказишни мақсад қилганмиз. Бунинг учун Ўзбекистонда барча имконият мавжуд.