Пойтахтимизда Европа Иттифоқи томонидан молиялаштириладиган, Ўзбекистон Республикаси Қишлоқ хўжалиги вазирлиги ҳамда БМТ Тараққиёт Дастури (БМТ ТД) ҳамкорлигидаги “Қишлоқ хўжалиги ва озиқ-овқат секторининг “яшил иқтисодиёт”га инклюзив ўтишини қўллаб-қувватлаш ва иқлимга йўналтирилган қишлоқ хўжалиги билимлари ва инновацион тизимини ривожлантириш (EU-AGRIN”)» лойиҳаси доирасида «Инновацион гуруҳлар»ни молиявий грантлар билан тақдирлаш маросими ташкил этилди.
Тадбирда Қишлоқ хўжалиги вазирининг маслаҳатчиси Алишер Шукуров, Европа Иттифоқининг Ўзбекистондаги делегацияси Ҳамкорлик бўлими раҳбари Вим Риепма, Ўзбекистондаги БМТ Тараққиёт дастурининг доимий вакили Матилда Димовска ҳамда бир қатор хорижий ва маҳаллий экспертлар иштирок этди.
Тадбирни кириш сўзи билан очиб берган Қишлоқ хўжалиги вазирининг маслаҳатчиси Алишер Шукуров бугунги кунда юртимиз аграр соҳасида янги билим ва инновациялар тизими жорий этилаётгани, мазкур тизимнинг соҳани ривожлантиришдаги ўрни ҳақида ўз фикрларини билдириб ўтди.
Шунингдек, Европа Иттифоқи ва БМТ Тараққиёт дастури Ўзбекистонда қишлоқ хўжалигини ривожлантиришга хизмат қилувчи Инновацион гуруҳлар учун 1 миллион АҚШ долларидан зиёд маблағ ажратгани ва бу маблағлар айнан ғолиб чиққан Инновацион гуруҳларга топширилиши қайд этилди.
Таъкидланишича, Европа тажрибаси асосида Марказий Осиёда илк маротаба ташкил этилаётган “Инновацион гуруҳлар” қишлоқ хўжалигида иқлим ўзгаришига мослашиб, унинг салбий оқибатларини юмшатишга қаратилган илмий-амалий ечимга эга инновацион лойиҳаларни ишлаб чиқиши ва уни амалга ошириши кўзда тутилган.
Маълумот ўрнида айтиш лозимки, ушбу гуруҳларнинг энг яхши лойиҳаларини молиялаштириш мақсадида ўтган 2022 йилнинг декабрь ойида “Инновацион ғоялар” танлови эълон қилинган эди. Танловга жами 201 та ариза келиб тушган бўлиб, саралаш босқичида ҳар бир аризанинг батафсил бизнес-режаси ўрганиб чиқилди. Қишлоқ ҳўжалиги соҳасида фаолият юритувчи етук мутахассис ва илмий ходимлардан иборат экспертлар комиссияси томонидан энг яхши 19 та «Инновацион гуруҳ»нинг аризаси молиялаштиришга лойиқ деб топилган.
Муҳайё Тошқораева, Муҳаммад АМИН (сурат), ЎзА