Мамлакатимизда бўлиб ўтган Ўзбекистон Республикаси Президенти сайловини 15 та халқаро ташкилот, 47 та хорижий давлатдан ташриф буюрган 800 га яқин халқаро кузатувчи бевосита кузатиб борди. Бугун халқаро ташкилотлар миссиялари вакиллари матбуот анжуманлари ташкил этиб, Ўзбекистондаги сайлов жараёнларини кузатиш натижаларини маълум қилди.

Жумладан, Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси (ЕХҲТ ДИИҲБ) сайловни кузатиш миссияси томонидан ҳам матбуот анжумани ташкил этилди. Унда ЕХҲТ ДИИҲБ миссияси вакиллари, Марказий сайлов комиссияси аъзолари, маҳаллий ва хорижий оммавий ахборот воситалари вакиллари иштирок этди.

Матбуот анжуманида қайд этилганидек, ЕХҲТ ДИИҲБ миссияси таркибида 220 нафар кузатувчи республикамизнинг турли нуқталаридаги қатор сайлов участкаларида бўлиб, сайловни кузатиш имконига эга бўлдилар. Ҳар бир сайлов участкасида сайловчиларнинг келиши, рўйхатдан ўтиши, бюллетенларни тўлдириши каби барча жараёнлар кузатиб борилди. Овоз бериш жараёнида фуқаролар куннинг биринчи ярмида фаоллик билан иштирок этгани айтилди.

Барча сайлов участкаларида партия вакиллари, маҳалла вакиллари ҳозир бўлиб, жараённинг шаффофлигини таъминлашга ўз ҳиссаларини қўшишгани алоҳида таъкидланди.

Шунингдек, миссия вакиллари сўнгги йиллардаги ислоҳотлар натижасида хотин-қизларнинг давлат ва жамиятдаги иштироки кенгаяётгани, хусусан, парламент аъзоларининг 29,8 фоизини хотин-қизлар ташкил этаётгани, шу жумладан сайлов жараёнида ҳам хотин-қизлар яхши иштирок этганини қайд этди.

Таъкидланишича, Марказий сайлов комиссияси сайловларни ташкил этиш ва ўтказиш ваколатига эга бўлиши баробарида кенг қонуний ваколатлар билан таъминланган. МСК муддат қисқалигига қарамай, сайловга тайёргарликни самарали бошқарди, қонунда белгиланган муддатларга риоя қилди. Мунтазам равишда йиғилишлар ўтказиб, сайлов жараёнининг турли жиҳатларини батафсил тартибга солиб турди. Шунингдек, МСК мажлисларида МСКга ва қуйи бўғин сайлов органларига келиб тушган мурожаатлар бўйича ҳисоботлар эълон қилиб борилди. Бу эса сайлов жараёнларининг очиқлигини оширади.

Матбуот анжуманида миссия вакиллари томонидан кузатилган айрим камчиликлар ҳам айтиб ўтилди ва қатор тавсиялар берилди.

Матбуот анжуманида ОАВ вакиллари ўзларини қизиқтирган қатор саволлар билан миссия вакилларига мурожаат қилди ва тегишли жавоблар олдилар.

ЕХҲТ ДИИҲБ сайловни кузатиш миссияси ўз кузатувлари бўйича якуний хулосаларини батафсил тақдим этишларини маълум қилди.

Муҳтарама Комилова, Ойбек Пардаев (сурат), ЎзА