2021 йилда 6,5 мингга яқин жиноят яширилган. Жиноятларни қасддан яширган масъул ходимларга нисбатан 44 жиноят иши қўзғатилган. Бу рақамлар Олий Мажлис Сенатининг бугун давом этаётган ялпи мажлисида қайд этилди.
Мажлисда Бош прокурорнинг 2021 йилдаги фаолияти тўғрисидаги ҳисоботи эшитилди. Бош прокурор Ниғматилла Йўлдошев прокуратура органлари ижтимоий соҳада белгиланган долзарб вазифалар ижросига алоҳида эътибор қаратаётганини қайд этди.
Хусусан, 4 минг 187 нафар фуқарога ўз вақтида тўлаб берилмаган 7 миллиард сўмлик иш ҳақи, пенсия ва нафақалар ундириб берилган. Шу билан бирга, 29 миллиард сўмлик бундай тўловлар талон-торож қилинганлиги аниқланиб, тегишли чоралар кўрилган.
“Обод қишлоқ”, “Обод маҳалла” ва бошқа дастурларга киритилган лойиҳалар учун режалаштирилган маблағлардан 1,5 триллион сўми тежаб қолинишига эришилган.
Ўз навбатида, сенаторлар прокуратура органлари томонидан амалга оширилган ижобий ишлар билан бирга айрим йўналишларда назоратни янада кучайтириш лозимлигини таъкидладилар.
Ҳуқуқни муҳофаза қилувчи идоралар ходимларининг ноқонуний хатти-ҳаракатлари юзасидан келиб тушган 3 минг 28 та ариза ва хабарларнинг барчаси бўйича терговга қадар текшириш ҳаракатлари ўтказилган. Текшириш натижаларига кўра, жами 161 жиноят иши қўзғатилиб, айбдор шахсларга нисбатан чоралар кўрилиши таъминлаган.
Сенат Раиси Танзила Норбоева ушбу масала ҳақида фикр билдириб, прокуратура тизимини халқчил органга айлантириш бўйича эътиборга молик ишлар амалга оширилаётганини таъкидлади.
– Бош прокурор ҳисоботи прокуратура органлари фаолиятига баҳо бериш билан бирга мамлакатда қонунийлик ҳолати ҳақида аниқ тасаввурга эга бўлиш имконини беради, – деди Т.Норбоева. – Келтирилган рақамлар қайси масалаларда ишлашимиз кераклигини кўрсатиб бермоқда. Бироқ, ҳисоботда хавотирли рақамлар ҳам бор. Булар – иш ҳақи ва унга тенглаштирилган тўловлар талон-тарож қилингани, археология объектларини реставрация қилишдаги талон-тарожликлар, ҳисоботларда янги иш ўринлари қўшиб ёзилганидир.
Тадбиркорларнинг бузилган ҳуқуқлари тиклангани айтилди. Бир қарашда бу ижобий натижа бўлиб кўриниши мумкин. Лекин, бошқа томондан қараганда, нима учун уларнинг ҳуқуқлари бузилган, ким бузган?
Қандай тизимли муаммолар борки, минглаб тадбиркорлар ўз ҳуқуқларини тиклаб беришни сўраб прокуратурага бормоқда? Булар ҳам масъул раҳбарларни жиддий ўйлантириши керак. Кўплаб раҳбарлар коррупцияда айбланиб, жиноий жавобгарликка тортилган.
Нима қилиш керак? Аввало ким бўлишидан қатъий назар жиноятга жазо муқаррарлигини барчанинг онгига сингдириш зарур. Қолаверса, жиноятга, жумладан, коррупцияга имкон берувчи сабаб ва омилларни бартараф этиш бўйича тизимли чораларни янада кенгайтириш ҳамда такомиллаштириш керак. Бу масалалар тизим раҳбарларини ўйлантириши зарур. Албатта, халқ вакиллари сифатида биз ушбу масалаларга бундан кейин ҳам устувор аҳамият қаратамиз, – деб алоҳида қайд этди Сенат Раиси.
Н.Абдураимова, ЎзА