Áziz doslar!
Eń dáslep, Qaraqalpaqstan Respublikası Joqarǵı Keńesi menen Ministrler Keńesi atınan baspa hám poligrafiya pidayıların, radio hám televidenie jámáátlerin, barlıq jurnalistlerimiz benen dóretiwshi insanlardı, taraw veteranların 27-iyun – Baspasóz hám ǵalaba xabar quralları xızmetkerleri kúni menen qızǵın qutlıqlaymız.
Ózlerińiz jaqsı bilesizler, elimizde Birinshi Prezidentimiz I.A.Karimovtıń baslaması menen tarawdı túpkilikli reformalaw, onıń materiallıq-texnikalıq bazasın bekkemlew, kadrlardıń kásiplik potenсialın arttırıw baǵdarında qolǵa alınǵan jumıslar búgingi kúnde jáne de nátiyjeli dawam etpekte.
Jámiyetlik turmıstıń barlıq tarawların bunnan bılay da rawajlandırıw, xalqımızdıń máplerin qorǵaw, múshkilin ańsat etiw, olarǵa múnásip miynet hám turmıs sharayatların jaratıw, usı maqsette insanlar menen ashıq-aydın pikirlesiw ornatıw baǵdarındaǵı iygilikli islerdi búgin xalqımız ayrıqsha qanaatlanıwshılıq penen kútip almaqta.
Búgingi sáne múnásibeti menen Húrmetli Prezidentimiz Sh.M.Mirziyoevtıń baspasóz hám ǵalaba xabar quralları xızmetkerlerine jollaǵan bayram qutlıqlawında bildirilgen «Xalıq penen pikirlesiw, adamlardıń arzıw-umtılısları, dárti hám táshwishleri menen jasaw mámleketlik siyasat dárejesine kóterilip atırǵan búgingi kúnde hár bir ǵalaba xabar quralı shın mánisindegi pikirlesiw maydanshasına, erkin pikir minberine aylanǵan jaǵdayda ǵana biz óz aldımızǵa qoyǵan maqsetlerge erise alamız», degen bahalı pikirler taraw xızmetkerlerin, barlıq dóretiwshi insanlardı xalıqtıń ishine ele de tereńirek kirip barıwǵa, olardıń turmısında ushırasıp atırǵan másele hám mashqalalardı unamlı sheshiwge úles qosıwǵa ruwxlandıradı, dep bekkem isenemiz.
Sonı da atap ótiwimiz tiyis, Húrmetli Prezidentimiz tárepinen «Ózbekistan Respublikasın bunnan bılay da rawajlandırıw boyınsha Háreketler strategiyası haqqında»ǵı arnawlı Pármannıń qabıl etiliwi elimizdi jáne de turaqlı pátler menen rawajlandırıw ushın pútkilley jańasha qatnas hámde prinсiplerdi turmısqa engiziwde ayrıqsha orın tutpaqta.
Bul óz gezeginde ǵalaba xabar quralları xızmetkerlerinen úzliksiz izleniwdi, turmısımızda júz berip atırǵan hárqanday ózgerisler menen jańalanıwlar proсesiniń mazmun-mánisin xalqımızǵa keń túrde hám hár tárepleme tásirsheń usılda úgit-násiyatlawdı, bir sóz benen aytqanda, búgingi tez pát penen rawajlanıp atırǵan dáwir menen teń qádem taslawdı talap etpekte.
Óytkeni, bul kásip iyeleri haqqında sóz bolǵanda xalqımız eń dáslep elimizde jámiyetlik-siyasiy reformalardı, demokratiyalıq jańalanıwlardı keńnen en jaydırıwǵa úles qosıp kiyatırǵan, jańasha pikirleytuǵın, bársheni iygilikli maqsetlerge baǵdarlaytuǵın insanlardı kóz aldına keltiredi.
Biraq sonı umıtpawımız kerek, házirgi rawajlanıwlar dáwiri baspasóz hám ǵalaba xabar qurallarına hámde olardıń dóretiwshilik jámáátlerine jańasha talaplar qoymaqta. Xalıqtıń tez hám isenimli maǵlıwmatqa bolǵan talabın qanaatlandırıw, eń zamanagóy málimleme-kommunikaсiya texnologiyaların keńnen paydalanıw, televidenie kórsetiwleri menen radioesittiriwlerdiń, poligrafiya ónimleriniń sapasın túp-tiykarınan jaqsılaw búgingi kúndegi keshiktiriwge bolmaytuǵın wazıypalarımızdan sanaladı.
Bunda taraw xızmetkerleriniń erkin jumıs alıp barıwı ushın huqıqıy tiykarlardıń bekkemlengeni, mámleketimiz tárepinen dóretiwshi insanlardıń materiallıq hám ruwxıy jaqtan xoshametleniwi baspasóz hám ǵalaba xabar quralları jumıslarınıń tez pát penen rawajlanıwına bekkem tiykar salmaqta.
Bıyılǵı jılı jámiyetlik-siyasiy turmısımızda júz berip atırǵan ózgerisler menen jańalanıwlardı keń jámiyetshilikke jetkeriwde ayrıqsha áhmiyetke iye Qaraqalpaqstan radiokanalı, xalqımızdıń ruwxıy dúnyasın bayıtıwda salmaqlı ornı bar «Ámiwdárya» jurnalı, balalarımızdıń súyikli basılımı sanalǵan «Jetkinshek» gazetası ózleriniń 85 jıllıǵın, ǵárezsizligimizdiń jemisi bolǵan «Qoraqalpoǵiston tongi» gazetası 25 jıllıǵın, sonday-aq, bir qatar rayonlıq hám tarawlıq basılımlar ózleriniń qutlı sánelerin keń túrde belgilep atır.
Bul maǵlıwmatlar qaraqalpaq jurnalistikası múnásip rawajlanıw basqıshlarınan ótip, tarawda ılayıqlı kadrlar potenсialı qálipleskenin, olardıń materiallıq-texnikalıq bazaları bekkemlengenin jáne bir márte dálilleydi.
Qádirli doslar, taraw pidayıları!
Bársheńizdi jáne bir márte kásiplik bayramıńız benen qızǵın qutlıqlap, Sizlerge bekkem densawlıq, shańaraǵıńızǵa amanlıq, baxıt-ıǵbal, dóretiwshilik jumıslarıńızda tasqın tabıslar tileymiz.

Qaraqalpaqstan Respublikası Joqarǵı Keńesi

Qaraqalpaqstan Respublikası Ministrler Keńesi