Nókistegi Jaslar orayında Samarqand mámleketlik veterenariya medicinası, sharwashılıq hám biotexnologiyalar universiteti Nókis filialı tárepinen Xalıqaralıq awıl hayalları kúni múnásibeti menen ilaj shólkemlestirildi.
Onda sózge shıqqanlar, sońǵı jıllarda mámleketimizde awıl xojalıǵı tarawında ámelge asırılıp atırǵan tiykarǵı reformalar, jańalanıwlar, erisilgen unamlı nátiyjeler hám bul processlerdi ámelge asırıwda insan qádiri menen máplerin támiyinlewde ayrıqsha itibar qaratılıp atırǵanlıǵına toqtap ótildi. Sonday-aq, agrar tarawdıń jáne de joqarı dárejede rawajlanıwı, xalıqtı sapalı awıl xojalıǵı ónimleri menen támiyinlew hám awıllarda jasaytuǵın watanlaslarımızdıń turmıs tárizin jáne de jaqsılaw, abadanlıǵın arttırıwda salmaqlı úles qosıp kiyatırǵan awıl hayallarınıń shıdamlılıǵı itibarǵa ılayıq ekenligi atap ótildi.
-Awılda jasap, hadal miynet etip kiyatırǵan hayallardıń jámiyettegi ornın kórsetiw, olardıń usınısların úyrenip, mashqalaların unamlı sheshiwge itibar qaratıw, belsendi hám intaker hayallardı múnásip xoshametlew búgingi kúnde júdá áhmiyetli másele, -deydi Ózbekstan Respublikası veterinariya hám sharwashılıqtı rawajlandırıw mámleketlik komiteti baslıǵınıń mámleketlik til máseleleri boyınsha másláhátshisi M.Abdukarimova. – Jaqsı hám ápiwayı, pidayılıq tımsalı bolǵan, awıllarımızdıń abadanlıǵı, shańaraǵımız dasturxanınıń tolı bolıwına úlken úles qosıp kiyatırǵan awıl hayalları hár qashan húrmet hám itibarda.
Ilaj dawamında bayram múnásibeti menen awıl xojalıǵı tarawında kóp jıllardan berli nátiyjeli jumıs islep kiyatırǵan hayal-qızlar hám filialdıń bir topar hayal-qızları Ózbekstan Respublikası veterinariya hám sharwashılıqtı rawajlandırıw mámleketlik komiteti tárepinen minnetdarshılıq hám estelik sawǵaları menen sıylıqlandı.
Belgili qosıqshılardıń atqarıwındaǵı qosıq hám namalar bárshege bayram keypiyatın baǵıshladı.
D. Abibullaev
Qaraqalpaqstan xabar agentligi