Qánigelestirilgen bilimlendiriw mákemeleri agentligi sistemasındaǵı Nókis qalası 1-sanlı qánigelestirilgen mektep-internattıń pitkeriwshisi Shaxsánem Abdullaeva «Еl-yurt Umidi» fondı tárepinen ótkerilgen imtixannan tabıslı ótip, dúnyadaǵı eń jaqsı TOP 300 likke kiretuǵın AQShtıń The University of Arizona universitetine oqıwǵa kiriwge miyasar boldı.
-Ózim sırt ellerde oqıp, bilim alǵandı qáleytuǵın edim,-deydi Shaxsánem.-Sonlıqtan mektepte oqıp júrip, inglis tilinen muǵallimimiz Gúlnaz Tilewmuratovaǵa tayarlandım hám usı jılı IELTS sertifikatın alıwǵa miyasar boldım. Sońınan «Еl-yurt Umidi» fondına hújjet tapsırıp, 14-avgust kúni sın pikirlew boyınsha, 19-avgustta ruwxıylıq boyınsha sáwbetlesiw imtixanın tapsırdım. Kúni keshe ǵana bul imtixannan ótkenligim boyınsha xabar esittim. Endi nesip etse, AQShtıń eń bir abıraylı joqarı oqıw orınlarınıń birinde oqıyman dep otırman. Al, házir bolsa, Tashkent qalasındaǵı Ózbekstan mámleketlik jáhán tilleri universitetiniń shıǵıs tilleri fakultetinde koreys tili qánigeliginde bilim alıp atırman.
-Mektebimizdi 2023-2024-oqıw jılında 41 oqıwshı pitkerip, sonnan 95 procent pitkeriwshi joqarı oqıw orınlarına oqıwǵa kiriwge eristi,-deydi Nókis qalası 1-sanlı qánigelestirilgen mektep-internattıń direktorı Marat Ibrayımov.-Usı pitkeriwshilerimiz arasınan Shaxsánem Abdullaevanıń «Еl-yurt Umidi» fondı imtixanlarınan tabıslı ótip, AQShtaǵı eń bir iri oqıw orınlarınıń birine oqıwǵa kirgenine oǵada quwanıshlıman. Endi bul qızımız AQShta biotexnologiya qánigeligi boyınsha bilim aladı hám ol jaqtan elimizge jetik qánige bolıp keledi dep oylayman. Bıyılǵı pitkeriwshilerimiz arasınan da usınday bilimli jaslar kóplep shıǵatuǵınlıǵına bekkem isenemen.
Haqıyqatında da, búgingi kúni 456 oqıwshı bilim alıp atırǵan bul oqıw ornında, oqıwshılardıń zaman talabına say tálim-tárbiya alıwı ushın barlıq qolaylı sharayatlar jaratıp berilgen. Atap aytqanda, oqıwshılar 5 mezgil awqat, uzaq rayonlardan kelip oqıytuǵın oqıwshılar bolsa, jataqxana menen támiyinlengen. Olarǵa óz kásibiniń mamanları bolǵan 52 muǵallim tálim-tárbiya bermekte.

Adilbay Orazov,
Qaraqalpaqstan xabar agentligi sholıwshısı.