Oraylıq saylaw komissiyasınıń gezektegi májilisi bolıp ótti. Onda saylawlardı ótkeriwde jámiyetlik tártipti saqlaw hám qáwipsizlikti támiyinlew, saylaw okrugleri hám uchastkalarınıń aymaqların ayrıqsha jaǵdaylardan qorǵaw hám órt qáwipsizligin támiyinlew, sonday-aq, saylaw komissiyaları jaylasqan imaratlardı úzliksiz elektr energiyası menen támiyinlew ilajları hám basqa da shólkemlestiriw máseleleri kórip shıǵıldı.
Atap ótilgenindey, aldımızda turǵan saylawdı ótkeriwde jámiyetlik tártipti saqlaw hám jámiyetlik qáwipsizlikti támiyinlew áhmiyetli máselelerden biri bolıp esaplanadı. Caylaw kúni tınısh hám turaqlı bolıwı saylawshılardıń dawıs beriwin erkin, qálewli hám xalıqaralıq standartlar tiykarında ámelge asırıw imkaniyatın beredi.
Usı múnásibet penen májiliste Ishki isler ministrligi, Milliy gvardiya, Ayrıqsha jaǵdaylar ministrligi hám Еnergetika ministrliginiń basshıları tárepinen saylawlarǵa tayarlıq kóriw dáwirinde ámelge asırılǵan jumıslar haqqında málimlemeler berildi.
Atap ótilgenindey, qáwipsizlik hám tártipti saqlaw maqsetinde juwapker ministrlik hám uyımlar tárepinen saylaw uchastkalarınıń imaratları átirapına qosımsha 332 videobaqlaw kameraları, 528 imaratqa jaqtılandırıw úskeneleri ornatıldı. Barlıq imaratlarǵa alıp baratuǵın jollar tekseriwden ótkerildi. 270 imarat átirapında avtomobil turıw orınları shólkemlestirildi. Barlıq aymaqta saylaw kúni jámiyetlik tártip hám qáwipsizlikti támiyinlew ilajları kórilmekte.
Májiliste Ayrıqsha jaǵdaylar ministri orınbasaranıń bergen maǵlıwmatına bola, barlıq saylaw uchastkalarınıń órtke qarsı jaǵdayı tekseriwden ótkerilgen. 450 inde profilaktikalıq tekseriw shólkemlestirilgen hám qosımsha túrde 664 imarat órtti óshiriw baslanǵısh quralları menen támiyinlengen.
Sonıń menen birge, Еnergetika ministrligi tárepinen saylaw kúni komissiyalardıń imaratların úzliksiz elektr energiyası menen támiyinlew ilajlarınıń kórilgeni málim etildi.
Májiliste juwapkerlerdiń málimlemelerin inabatqa alǵan halda Oraylıq saylaw komissiyası tárepinen bolajaq saylawlardı ótkeriw dáwirinde jámiyetlik tártipti hám qáwipsizlikti támiyinlew, ayrıqsha jaǵdaylardan qorǵaw, órt qáwipsizligin támiyinlew haqqında qarar qabıl etildi.
Sonday-aq, májiliste sırt eller hám xalıqaralıq shólkemlerdiń 108 wákilleri xalıqaralıq baqlawshı sıpatında akkreditaciyadan ótkerildi, aymaqlıq saylaw komissiyalarınıń saylawǵa tayarlıq jumısları boyınsha málimlemeleri tıńlandı. Kórip shıǵılǵan barlıq máseleler boyınsha tiyisli qararlar qabıl etildi.
Muhtarama Komilova,
ÓzA