Ózbekstan Respublikasi Oliy Majlisi Nızamshılıq palatası hám jergilikli Keńeslerdiń deputatların saylawǵa tayarlıq kóriw hám ótkeriw boyınsha jumıslar qızǵın alıp barılmaqta.
Atap aytqanda, siyasiy partiyalar tárepinen deputatlıqqa usınılǵan talabanlardıń óz saylawshıları menen saylawaldı ushırasıwları ótkerilmekte.
Sonıń menen birge, Ózbekstan Respublikası Saylaw kodeksiniń 57-statyası hám Qaraqalpaqstan Respublikasınıń «Saylaw haqqında»ǵı nızamınıń 56-statyasına muwapıq, respublikamızdıń barlıq aymaqlarında saylawshılardıń ózleri qálegen siyasiy partiya hám olar tárepinen deputatlıqqa usınılǵan talabanlarǵa múddetinen burın dawıs beriw procesi baslandı.
-19-uchastkalıq saylaw komissiyası Nókis qalasındaǵı 32-sanlı ulıwma orta bilim beriw mektebinde jaylasqan bolıp, komissiyamız tárepinen 2376 saylawshı dizimge alınǵan,-deydi komissiya baslıǵı Gúlnara Tajenova.-Komissiya aǵzaları tárepinen bul saylawshılardıń dizimi dúzildi. Sonnan 54 puqara óz ómirinde birinshi márte saylawlarǵa qatnasadı. Al, 55 puqara bolsa, saylawda qatnasıw imkaniyatı bolmawına baylanıslı óziniń jasaw úyinde dawıs beredi. 19-uchastkalıq saylaw komissiyasında saylawshılardıń dawıs beriwi ushın barlıq qolaylı sharayatlar jaratılǵan. Mine, búgin saylaw kúni óziniń jasaw ornında bola almaytuǵın puqaralar uchastkamızǵa kelip, ózleri qálegen siyasiy partiya hám olar tárepinen deputatlıqqa usınılǵan talabanlarǵa múddetinen burın dawıs bermekte.
Adilbay Orazov,
Qaraqalpaqstan xabar agentligi sholıwshısı.