Paytaxtımızdaǵı Qaraqalpaq mámleketlik quwırshaq teatrında 27-iyun-Baspasóz hám ǵalaba xabar quralları xızmetkerleri kúnine baǵıshlanǵan saltanatlı jıynalıs bolıp ótti.
Ilajda Qaraqalpaqstan Respublikası Joqarǵı Keńesi menen Ministrler Keńesiniń Baspasóz hám ǵalaba xabar quralları xızmetkerlerine jollaǵan bayram qutlıqlawın Joqarǵı Keńestiń komitet baslıǵı D.Qurbaniyazov oqıp esittirdi.
Bunnan keyin Ózbekistan Jurnalistleri dóretiwshilik awqamı Qaraqalpaqstan bóliminiń baslıǵı K.Reymov, Ózbekistan Respublikası Oliy Majlisi Senatınıń aǵzası, Qaraqalpaqstan xalıq shayırı G.Annaqlıcheva, Ózbekistan «Nuranıy» qorı Qaraqalpaqstan bóliminiń baslıǵı Sh.Usnatdinov, Qaraqalpaqstan Respublikası Mádeniyat ministri P.Aytmuratov hám taǵı basqa da shólkemler basshıları shıǵıp sóylep, jıynalǵanlardı kásiplik bayram menen qutlıqladı.
Atap ótilgenindey, mámleketimiz basshısı Sh.Mirziyoevtıń basshılıǵında turmısımızdıń barlıq tarawlarında ámelge asırılıp atırǵan keń kólemli reformalar ǵalaba xabar quralları xızmetkerlerinen jáne de belsendilikti, intalıqtı, elimizde bolıp atırǵan jańalanıw proсesslerin tereń talqılaw tiykarında sáwlelendiriwdi talap etpekte. Xalıq penen ashıqtan-ashıq pikirlesiw, adamlardı oylandırıp atırǵan máselelerge óz waqtında sheshim tabıw, jámiyetlik turmıstıń barlıq salalarında ámelge asırılıp atırǵan reformalardı mazmun hám sapa jaǵınan jańa basqıshqa kóteriw, watanlaslarımızdıń tınısh jáne abadan, tatıw turmıs dárejesin jańa mazmun menen bayıtıw, jaslardıń ruwxıy sana-sezimin arttırıw baǵdarında alıp barılıp atırǵan iygilikli isler baspasóz hám ǵalaba xabar quralları xızmetkerleri aldına jańa wazıypalardı qoymaqta.
Prezidentimizdiń baslaması menen islep shıǵılǵan 2017-2021-jıllarda Ózbekistan Respublikasın rawajlandırıwdıń tiykarǵı bes baǵdarı boyınsha Háreketler strategiyası mámleket hám jámiyettiń hár tárepleme, jedel rawajlanıwı ushın keń sharayatlar jaratıw, elimizdi modernizaсiyalawdıń jańa perspektivaların belgilep berdi.
Usı wazıypalar tiykarında jámiyette ǵalaba xabar qurallarınıń rolin kúsheytiw, jurnalistlerdiń jumısın qorǵaw, mámleketlik hákimiyat hám basqarıwshı uyımlardıń jumısınıń ashıq-aydınlıǵın támiyinlew, fizikalıq hám yuridikalıq shaxslardıń huqıqları menen erkinlikleri, sonday-aq, nızamlı máplerine baylanıslı xabarlardı tayarlaw jáne usınıwdıń jańa formaları engizilmekte. Tarawǵa zamanagóy texnologiyalardı engiziw, taraw xızmetkerlerin qollap-quwatlaw hám xoshametlew, olardıń kásiplik poteсialın arttırıw, xalqımızdı operativ hám real málimlemeler menen támiyinlew boyınsha sistemalı jumıslar ámelge asırılmaqta.
Ilajda bir topar baspasóz hám ǵalaba xabar quralları xızmetkerlerine Húrmet jarlıqları hám sıylı sawǵalar tapsırıldı.
Saltanatlı májilis respublikamız kórkem óner sheberleriniń konсert baǵdarlaması menen juwmaqlandı.
N.REYPNAZAROV,
Qaraqalpaqstan xabar agentliginiń xabarshısı.