Oraylıq bank baslıǵı Timur Ishmetovtiń jeke menshik hám sırt el kapitalı qatnasıwındaǵı kommerciyalıq banklerdiń basshıları menen ushırasıwı bolıp ótti.
Onda Ózbekstan Prezidenti tárepinen bank sisteması aldına qoyılıp atırǵan tiykarǵı wazıypalar hám aldaǵı ámelge asrılıwı kútilip atırǵan jumıslar boyınsha pikir alıstı.
Ushırasıwda sanlı bank xızmetlerin rawajlandırıw, mikro hám kishi biznes ushın jańa bank ónimlerin engiziw, xalıqaralıq qarjı instiutları menen birge islesiwdi keńeytiw, bank xızmetleriniń ǵalabalıǵın arttırıw, kreditlew sistemasın jetilistiriw hám basqa áhmiyetli máseleler dodalandı.
Sonday-aq, bank sistemasınıń normativlik-huqıqıy bazasın jáne de jetilistiriw boyınsha ámeliy usınıslar hár tárepleme úyrenip barılatuǵını atap ótildi. Ilajda qatnasqan bank basshıları kredit ónimleriniń túrin kóbeytiw hám kredit beriwdiń skoring-tallaw sistemasın jaqsılaw boyınsha óz usınısların bildirdi.
Ushırasıw sońında Oraylıq bank baslıǵı kommerciyalıq bankler menen turaqlı ashıq sóylesiwler ótkeriwge, tarawdı jáne de jaqsılaw boyınsha pikir alısıw, usınısları menen tanısıwǵa hámiyshe tayar ekenligin bildirdi.
ÓzA