Jaqında Nókis qalalıq Mádeniyat hám xalıqtıń dem alıw orayında «Jalǵızsań, sen muqqaddes Watan!» tańlawınıń qalalıq basqıshı bolıp ótti.
Oǵan jigirmaǵa jaqın qalalıq mádeniyat hám xalıqtıń dem alıw orayı xalıq ansambllerinen, joqarı hám orta arnawlı oqıw orınları menen balalar kórkem óner mektepleriniń studentleri jáne oqıwshıları qatnastı. Tańlaw qatnasıwshılarını shayır, kompozitor hám belgili kórkem óner ǵayratkerleri menen birge islesiwi máselelerine ayrıqsha itibar qaratıldı. Onda ana-Watan, tuwılǵan jerdi jırlawshı biri-birinen ózgeshe janlı hawazdaǵı qosıqlar atqarıldı.
Tańlawda Esjan baqsı atındaǵı 1-sanlı balalar muzıka hám kórkem óner mektebiniń oqıwshısı Z.Maqsudova, Nókis mádeniyat hám kórkem óner kolledji oqıwshıları S.Tilewmuratov, M.Beyimbetova, N.Bazarbaeva, G.Axmetova, Ámet baqsı atındaǵı 12-sanlı balalar muzıka hám kórkem óner mektebiniń oqıwshısı N.Tólemisov, «Ilme sultan» qosıq hám oyın xalıq ansambli qosıqshısı Á.Ómirzaqov, «Aq jaǵıs» mádeniyat hám xalıqtıń dem alıw orayı qosıqshısı R.Yusupovlar óz talantı menen ayrıqsha dep tabılıp, 15-iyul kúni Berdaq atındaǵı Qaraqalpaq mámleketlik akademiyalıq muzıkalı teatrında bolıp ótetuǵın respublikalıq basqıshqa jollama aldı.

Tárbiya SEYTNAZAROVA,
Qaraqalpaqstan xabar agentligi xabarshısı