Tashkent qalasında 2017-jıl 20-iyun kúni Ózbekistan Respublikası Sawda-sanaat palatasınıń gezeksiz quraltayı bolıp ótti.
Quraltayda Prezidentimiz Shavkat Mirziyoevtıń usı jıl 19-iyundegi «Biznestiń nızamlı mápleriniń mámleket tárepinen qorǵalıwına hám isbilermenlik jumısın bunnan bılay da rawajlandırıw sistemasın túp-tiykarınan jetilistiriwge baylanıslı ilajlar xaqqında»ǵı pármanı hám «Ózbekistan Respublikası Sawda-sanaat palatasınıń jumısın shólkemlestiriwge baylanıslı qosımsha ilajlar xaqqında»ǵı qararında belgilengen wazıypalardan kelip shıqqan halda Ózbekistan Respublikası Sawda-sanaat palatası aldında turǵan áhmiyetli wazıypalar kórip shıǵıldı.
Elimizde jeke menshik iyeleriniń huqıqları menen nızamlı mápleriniń qorǵalıwın, isbilermenlik subektleriniń jumısına tiykarsız aralasıwlardan isenimli huqıqıy kepilliklerdi támiyinlep beretuǵın bekkem nızamshılıq bazası jaratıldı.
Elimizde 525 mıńnan aslam isbilermenlik subekti jumıs alıp barmaqta. Jalpı ishki ónimniń 56 proсentten aslamın qurap, miynetke jaramlı xalıqtıń 78 proсentten zıyatın jumıs penen támiyinlep atırǵanı kishi biznes hám jeke isbilermenlik subektleriniń elimizdiń jámiyetlik-siyasiy, soсiallıq-ekonomikalıq rawajlanıwındaǵı ornı menen roli barǵan sayın artıp atırǵanınan dárek beredi. Mámleketimiz basshısı Shavkat Mirziyoev tárepinen alǵa qoyılǵan 2017-2021-jıllarda Ózbekistandı rawajlandırıwdıń bes tiykarǵı baǵdarı boyınsha Háreketler strategiyasında belgilengen wazıypalardı orınlaw, sonıń menen birge, biznes salası wákilleri hám mámleketlik uyımlar arasında nátiyjeli sóylesiw jáne paydalı birge islesiw mexanizmlerin jolǵa qoyıw, jeke menshiktiń hám isbilermenliktiń huqıqları menen nızamlı máplerin isenimli qorǵawdıń kepilliklerin kúsheytiw, wálayatlarda jáne rayonlarda biznes-ortalıqtı jetilistiriw máseleleri boyınsha, sonday-aq, isbilermenlik subektlerine, bárinen burın, wálayatlarda, qalalar menen rayonlarda sapalı mámleketlik hızmetler usınılıwın támiyinlew mámleketlik uyımlar menen isbilermenlik strukturalardıń óz-ara birge islesiwin, ásirese, isbilermenlik subektleriniń jumısın endi baslaǵan dáwirlerde olardı qollap-quwatlawdıń jańa nátiyjeli sistemasın jaratıwdı talap etedi.
Usı jerde ekonomikada jeke sektordıń poziсiyaların bekkemlew maqsetinde 2004-jılı isbilermenlik subektlerin birlestiretuǵın mámleketlik emes kommerсiyalıq emes shólkem sıpatında shólkemlestirilgen Ózbekistan Respublikası Sawda-sanaat palatasınıń wazıypaların, jumıs baǵdarları menen wákilliklerin túp-tiykarınan qayta kórip shıǵıw úlken áhmiyetke iye ekeni atap ótildi. Sonıń menen birge, palata shólkemlestirilgennen berli elimizde isbilermenlik subektleri eki esege, sektorda jumıs penen bánt bolǵanlar bir yarım esege kóbeygeni olardıń huqıqları menen nızamlı máplerin isenimli qorǵawdı, isbilermenlik ortalıǵın bunnan bılay da jaqsılawdı talap etpekte. Onda Sawda-sanaat palatasınıń imkaniyatlarınan nátiyjeli paydalanıw bul baǵdardaǵı reformalardı jańa basqıshqa kóteriwde úlken áhmiyetke iye.
Quraltayda atap ótilgenindey, pármanda usı máselelerge ayrıqsha itibar qaratılǵan. Atap aytqanda, Sawda-sanaat palatası tárepinen ámelge asırılıwı tiyis bolǵan wazıypalar anıq belgilep berilgen. Oǵan bola, palata isbilermenlik huqıqların qorǵaw, isbilermenlikti jáne investiсiyalıq ortalıqtı jaqsılaw, isbilermenlik jumısına kómeklesiw, mámleketlik uyımlar menen óz-ara birge islesiw, isbilermenlik subektlerin oqıtıw hám kadrlar tayarlaw jáne sırtqı ekonomikalıq xızmetler menen investiсiyalardı tartıw salaları boyınsha jumıs alıp baradı.
– Sawda-sanaat palatası tárepinen Prezidentimiz hám isbilermenlik subektleri arasında tikkeley pikirlesiwlerdi támiyinlew maqsetinde ushırasıwlardıń shólkemlestiriliwi barlıq isbilermenlerdi quwandıradı, – deydi «D3n5af8ll Pl67!» kárxanasınıń basshısı Sarkor Esonboev. – Bul mámleketlik uyımlar menen jeke sektor arasındaǵı birge islesiwdiń joqarı kórinisi sıpatında biz isbilermenlerdiń aldında turǵan hár qıylı tosqınlıqlardı saplastırıwdı támiyinlew, ózimizdiń ideyalarımız jáne usınıslarımız benen elimizdiń rawajlanıwına múnásip úles qosıw imkaniyatın jaratadı.
Mámleketimiz basshısınıń «Biznestiń nızamlı mápleriniń mámleket tárepinen qorǵalıwına hám isbilermenlik jumısın bunnan bılay da rawajlandırıw sistemasın túp-tiykarınan jetilistiriwge baylanıslı ilajlar xaqqında»ǵı pármanına muwapıq, Sawda-sanaat palatası normativlik-huqıqıy xujjetler joybarlarınıń isbilermenlik jumısına tásirin bahalaw xaqqında juwmaq shıǵarıw boyınsha wákillikli uyım bolıp belgilendi. Yaǵnıy, isbilermenlik salasındaǵı barlıq joybarlar májbúriy túrde Sawda-sanaat palatası menen kelisiliwi zárúr.
Qadaǵalawshı uyımlar tárepinen rejelestirilgen tekseriwler haqqında aldın ala Sawda-sanaat palatasına xabar etiliwi, sonday-aq, mámleketlik uyımlar, sonıń ishinde, qadaǵalawshı hám huqıq qorǵaw uyımları janında shólkemlestiriletuǵın jámiyetlik másláxát keńesleri quramına Sawda-sanaat palatası wákilleriniń kirgiziliwi tártibi engizilmekte.
Ózbekistan Respublikası Sawda-sanaat palatasınıń aldına qoyǵan wazıypalardı, berilgen qosımsha huqıqlar menen wákilliklerdi tolıq hám nátiyjeli ámelge asırıw maqsetinde pármannıń orınlanıwı sheńberinde Ózbekistan Respublikası Prezidentiniń «Ózbekistan Respublikası Sawda-sanaat palatasınıń jumısın shólkemlestiriwge baylanıslı qosımsha ilajlar haqqında»ǵı qararı qabıl etildi. Onda Sawda-sanaat palatasınıń shólkemlestiriwshilik-basqarıw strukturasın túp-tiykarınan jetilistiriw názerde tutılǵan.
– Bir neshe jıl burın eki adam menen jumısımızdı baslaǵan edik, -deydi «Beka Charos» kárxanasınıń basshısı Gulbeke Qwchqorova. –Kishi biznes hám jeke isbilermenlik subektleri ushın jaratılǵan qolaylı sharayatlardıń nátiyjesinde búgingi kúnge kelip kárxanamızdaǵı jumıs orınlarınıń sanı derlik eliwge jetti. Prezidentimizdiń pármanına muwapıq, elimizdiń barlıq aymaqlarında Isbilermenlikke kómeklesiw oraylarınıń shólkemlestiriliwi jumısımızda ushırasatuǵın hár qanday máseleni bir orında sheshiwge imkaniyat jaratadı.
Isbilermenlikke kómeklesiw orayları isbilermenlik subektlerine mámleketlik xızmetler kórsetip kiyatırǵan «bir ayna» orayları menen bir qatarda bank, lizing, qamsızlandırıw, auditorlıq, bahalaw, rieltorlıq kompaniyaları sıyaqlı bazar infrastrukturası subektlerin de birlestiriwdi názerde tutatuǵının atap ótiw kerek.
Ózbekistan Respublikası Sawda-sanaat palatasınıń jumısın jetilistiriwge qaratılǵan ilajlar isbilermenlik subektleriniń huqıqları menen nızamlı máplerin qorǵawdı bunnan bılay da kúsheytiw, biznesti shólkemlestiriw, sonday-aq, biznes-ortalıqtı jetilistiriw máseleleri boyınsha isbilermenler menen málimleme almasıwdıń nátiyjeli usılın engiziw imkaniyatın beredi. Sonıń menen birge, elimizde jeke menshiktiń hám isbilermenliktiń bunnan bılay da rawajlanıwı, shet el investiсiyalarınıń keńnen tartılıwı hám jergilikli islep shıǵarıwshılardıń sırtqı bazarlarǵa shıǵıwına xızmet etedi.
Quraltayda shólkemlestiriw máselesi qaraldı. Ózbekistan Respublikası Sawda-sanaat palatasınıń baslıǵı A.Shayxov basqa jumısqa ótiwi múnásibeti menen lawazımınan azat etildi. Ózbekistan Respublikası Prezidentiniń usınısına bola Ózbekistan Respublikası Prezidenti mámleketlik keńesgóyiniń birinshi orınbasarı, Prezident janındaǵı Mámleketlik basqarıw akademiyasınıń rektorı lawazımlarında jumıs islep kiyatırǵan A.Ikramov Ózbekistan Respublikası Sawda-sanaat palatasınıń baslıǵı etip saylandı.
Quraltayda Ózbekistan Respublikası Bas minitsri A.Aripov shıǵıp sóyledi.Ózbekistan Respublikası Prezidentiniń Mámleketlik keńesgóyi U.Ismoilov qatnastı.
Bexzod BOZOROV,
ÓzAnıń xabarshısı