«Júz júzge túskende, iyman ishke túsedi» deydi dana xalqımız. Shınında da saǵınǵan insanlarıń menen diydarlasqanǵa ne jetsin. Búgin zamanagóy texnologiyalar ásirinde kimdidur saǵınsańız, onı kóriw ushın uzaq jol basıp júrmeysiz.

Qolıńızdaǵı smartfon mıńlaǵan shaqırımdaǵı adam menen sizdi júzlestire aladı. Burınǵı waqıtları qurallı kúshler qatarında xızmet etken jigitler qolına qálem alıp óz jaqınlarına xat jazatuǵın yaki imkanın tawıp olarǵa telefon arqalı qońıraw etetuǵın edi.
Al, házir bolsa, zaman menen teń qádem atıp atırǵan áskerlerimiz ata-anları menen videokonferenc-baylanıs arqalı onlayn diydarlasıw baxtına miyasar bolmaqta.
Áne, usınday ushırasıwlardıń biri Nókis garnizonınıń Ruwxıylıq hám aǵartıwshılıq orayında bolıp ótti.
«Watansúyiwshilik aylıǵı» sheńberinde ótkerilgen telebaylanısta Qaraqalpaqstannan Samarqand wálayatına áskeriy xızmetke jiberilgen áskerler hám Samarqand wálayatınan Nókis garnizonındaǵı áskeriy bólimlerde ózleriniń azamatlıq minnetin ótep atırǵan jigitlerdiń ata-anaları hám jaqınları menen ushırasıw shólkemlestirildi.
«Ásker anaların dańqqa bóleymiz!» súreni menen ótkerilgen bul ilaj oǵada tásirli waqıyalarǵa tolı boldı. Onda ata-analar perzentleri menen diydarlasıp, olarǵa áwmetler tilep qaldı. Al, áskeriy kiyim kiygen jigitler bolsa, ózleriniń jigerli is-háreketi hám sózleri menen búgin haqıyqıy Watan qorǵawshısı bolǵanın kórsetti.
Ilajda bir topar qaraqalpaqstanlı ata-analar áskeriy bólim komandiriniń minnetdarshılıq xatı menen sıylıqlandı.

Adilbay Orazov,
Qaraqalpaqstan xabar agentligi sholıwshısı.