Ózbekistan Respublikası Prezidentiniń qararı
Ǵárezsizlik jıllarında xalqımızdıń bay tariyxı hám mádeniyatınıń ajıralmas bir bólegin quraytuǵın, ruwxıy rawajlanıwımız ushın oǵada úlken áhmiyetke iye bolǵan áyyemgi qol jazbalardı, kórkem dóretpelerdi, eski esteliklerdi saqlaw, olardı ilimiy jaqtan izertlew, elimiz hám dúnya jámiyetshiligi arasında úgit-násiyatlaw boyınsha keń kólemli jumıslar ámelge asırıldı.
Áne, usınday biybaha tariyxıy-mádeniy buyımlar tek ǵana xalqımız mádeniyatınıń dúrdanaları emes, al dúnya júzi kóleminde iri kollekсiyalar bolıp tabıladı.
Sonıń menen birge, elimizdiń tariyxı menen mádeniyatına baylanıslı kóplegen qımbat bahalı eksponatlar shet ellerdiń muzeylerinde jáne arxiv fondlarında saqlanbaqta. Bul mádeniy miyras esteliklerin anıqlaw hám izertlew, imkanı bolǵanınsha elimizge alıp keliw boyınsha sońǵı jıllarda kólemli jumıslar islendi.
Sonıń menen birge xalqımızdı, atap aytqanda, jaslarımızdı, áne, usı biybaha ruwxıy baylıqtan xabardar etiw, tariyxımızdıń jáne mádeniyatımızdıń námálim betlerin tereń úyreniw, shet ellerdegi Ózbekistanǵa tiyisli mádeniy baylıqlar tuwralı tolıq maǵlıwmatlar bazasın jaratıw, bul baǵdardaǵı jumıslardıń nátiyjeliligin bunnan bılay da arttırıw maqsetinde:
1. Ózbekistan Respublikası Mádeniyat ministrligi, Sırtqı isler ministrligi, Ilimler akademiyası, «Ózarxiv» agentliginiń Ózbekistan Respublikası Ministrler Kabineti janında Ózbekistanǵa tiyisli shet eldegi mádeniy baylıqlardı izertlew orayın (keyingi orınlarda Oray dep júrgiziledi) shólkemlestiriw haqqındaǵı usınısı maqullansın.
2. Tómendegiler Oraydıń tiykarǵı wazıypaları etip belgilensin:
milliy hám shet elli qánigelerdi tartqan halda, shet elde saqlanıp atırǵan, elimizdiń tariyxına jáne mádeniyatına tiyisli baylıqlardı anıqlaw, olardıń tolıq maǵlıwmatlar bazasın – reestrin jaratıw hám onı turaqlı jańalap barıw, sonday-aq, áne usı tariyxıy eksponatlardıń tiykarǵı yamasa kóshirme nusqalarınıń foto hám video súwretlerin elimizge alıp keliw, tiyisli ilimiy oraylar, atap aytqanda, Ábu Rayxan Beruniy atındaǵı Shıǵıstanıw institutı menen birgelikte ilimiy-izertlewler alıp barıw, erisilgen nátiyjelerdi ilimiy aylanısqa kirgiziw baǵdarındaǵı jumıslardı muwapıqlastırıw;
jumıs baǵdarı boyınsha shet ellerdegi muzey hám fondlar, arxivler, ilimiy-mádeniy mákemeler menen óz-ara mádeniy baylanıslardı jolǵa qoyıw, hár qıylı ánjumanlar, konferenсiyalar jáne kórgizbeler shólkemlestiriw;
shet ellerde saqlanıp atırǵan mádeniy baylıqlardı elimizge qaytarıw boyınsha sóylesiwler alıp barıw hám zárúr ilajlar kóriw, bul baǵdarda xalıqaralıq kólemdegi aldıńgı tájiriybeni úyreniw hám ámeliyatqa engiziw;
mádeniy baylıqlardıń alıp keliniwi hám alıp shıǵılıwı haqqındaǵı nızam hújjetlerine ámel etiliwin hám nátiyjeli orınlanıwın talqılaw, olardı jetilistiriw boyınsha usınıslar islep shıǵıw, sonday-aq, xalıqaralıq shártnamlar menen ulıwma tán alınǵan normalardı milliy nızamshılıǵımız kóz-qarasınan hár tárepleme úyreniw;
shet eldegi elimizdiń tariyxı menen mádeniyatına tiyisli mádeniy baylıqlardı ǵalaba xabar qurallarında, sonıń ishinde, globallıq internet tarmaǵında keńnen sáwlelendiriw, olar haqqında bibliografiyalıq toplamlar, kataloglar, kitap, albomlar hám basqa da poligrafiyalıq ónimlerdi hár túrli tillerde baspadan shıǵarıp barıw;
toplanǵan materiallardı elimiz hám dúnya júzi kóleminde ilimiy aylanısqa kirgiziw;
3. Ózbekistan Respublikası Ministrler Kabineti janındaǵı Ózbekistanǵa tiyisli shet eldegi mádeniy baylıqlardı izertlew orayınıń strukturalıq quramı 1-qosımshaǵa muwapıq tastıyıqlansın.
Oraydıń direktorına zárúrlik bolǵan jaǵdayda Oraydıń strukturalıq quramına xızmetkerlerdiń belgilengen ulıwma sheklengen sanı sheńberinde ózgerisler kirgiziw huqıqı berilsin.
4. Ózbekistanǵa tiyisli shet eldegi mádeniy baylıqlardı izertlew jumısların muwapıqlastırıw boyınsha respublikalıq komissiya (keyingi orınlarda Komissiya dep júrgiziledi) 2-qosımshaǵa muwapıq quramda dúzilsin hám tómendegiler onıń tiykarǵı wazıypaları etip belgilensin:
Oray tárepinen elimizdiń tariyxı menen mádeniyatına tiyisli shet eldegi mádeniy baylıqlardı izertlew boyınsha alıp barılatuǵın ilimiy-izertlew jumısların muwapıqlastırıw;
Oraydıń jıllıq jumıs alıp barıw rejesin tastıyıqlaw hám onıń ámelge asırılıwına kómeklesiw, sonday-aq, zárúrliginen kelip shıǵa otırıp, Orayǵa júklengen tiykarǵı wazıypalardıń orınlanıwın támiyinlew maqsetinde, Oraydıń usınısına tiykarlanıp onıń qánigelerinen hám basqa da shólkemlerden Orayǵa tartılatuǵın ekspertlerdi shet ellerge saparlarǵa jiberiw jumısların muwapıqlastırıw;
hár sherektiń juwmaǵı boyınsha Oraydıń esapların tıńlaw, onıń jumısınıń nátiyjeliligin bahalaw;
elimizdiń tariyxına jáne mádeniyatına tiyisli shet eldegi mádeniy baylıqlardı izertlew boyınsha mámleketlik hám xojalıq basqarıw uyımlarınıń jumısın muwapıqlastırıw hám bul baǵdarda zárúr ilajlardı ámelge asırıw.
5. Tómendegiler:
Oray Komissiyanıń jumısshı uyımı jáne Oray direktorı, lawazımına bola, Komissiyanıń juwaplı xatkeri esaplanatuǵını;
Oray Ózbekistan Respublikası Ministrler Kabinetiniń Bilimlendiriw, ilim hám jaslar siyasatı máseleleri málimleme-talqılaw departamentiniń juwapkershiliginde jumıs alıp baratuǵın, yuridikalıq shaxs statusına iye bolǵan mámleketlik mákeme bolıp esaplanatuǵını;
Oraydıń direktorı hám onıń orınbasarı Ózbekistan Respublikası Ministrler Kabineti tárepinen lawazımǵa tayınlanatuǵını hám lawazımnan azat etiletuǵını;
Oray xızmetkerlerine Ózbekistan Respublikası Ilimler akademiyası ilimiy-izertlew mákemeleriniń tiyisli lawazımları ushın belgilengen miynetke haqı tólew hám materiallıq xoshametlew shártleri qollanılatuǵını;
Oray Ózbekistan Respublikası Ilimler akademiyası Kórkem óner tanıw institutınıń Tashkent qalası, Yunusabad rayonı, mustaqillik maydanı, 2-jay mánzilindegi imaratına biypul paydalanıw huqıqı menen ornalastırılatuǵını;
Oraydıń jumısı nátiyjesinde shet elde saqlanıp atırǵan, elimizdiń tariyxı hám mádeniyatına tiyisli mádeniy baylıqlardıń túp yamasa kóshirme nusqaları, foto hám video kórinisleri Ózbekistan Respublikasına alıp kelingende (qaytarılǵanda), zárúr ilimiy-izertlew jumısları orınlanǵannan soń, olar Komissiyanıń juwmaǵına tiykarlanıp, tiyisli mámleketlik muzeyler qaramaǵına biypul ótkerip beriletuǵını belgilep qoyılsın.
6. Tómendegiler Oray jumısın qarjılandırıwdıń tiykarǵı dárekleri etip belgilensin:
Oraydı saqlap turıw qárejetleri, sonday-aq, 2017-jılı Oraydıń materiallıq-texnikalıq bazasın bekkemlewge baylanıslı qárejetler ushın ajıratılatuǵın Ózbekistan Respublikası Mámleketlik byudjeti qarjıları;
mámleketlik buyırtpa tiykarında ilimiy-izertlewlerdi orınlaw ushın Ózbekistan Respublikası Ilim hám texnologiyalar agentligi tárepinen ajıratılatuǵın maqsetli grant qarjıları;
Oray qánigelerin hám basqa da shólkemlerden oǵan tartılatuǵın ekspertlerdi shet ellerge xızmet saparlarına jiberiw hám sırt elli qánigeler (ekspertler)di tartıw qárejetleri hám Oraydıń jumısına baylanıslı basqa da qárejetler ushın isbilermenlik jumısınan, sonıń ishinde, baspa jumısınan túsetuǵın qarjılar, xalıqaralıq qarjı institutları, shet elli shólkemler, donor eller menen shólkemlerdiń grantları, sonday-aq, qáwenderlik ilajları hám nızam hújjetlerinde qadaǵan etilmegen basqa da dárekler.
7. Ilim hám texnologiyalar boyınsha Mámleketlik komissiya Oraydıń shet elde saqlanıp atırǵan, elimizdiń tariyxına hám mádeniyatına tiyisli mádeniy baylıqlardı úyreniw jumısların shólkemlestiriw ushın hár jılı ilimiy jaqtan tiykarlanǵan izertlewlerge mámleketlik buyırtpanı belgilengen tártipte tastıyıqlasın.
Ózbekistan Respublikası Ilim hám texnologiyalar agentligi Ilim hám texnologiyalar boyınsha Mámleketlik komissiya tárepinen hár jılı tastıyıqlanatuǵın mámleketlik buyırtpada belgilengen ilimiy-izertlewler ushın mámleketlik ilimiy-texnikalıq baǵdarlamaları sheńberindegi ilimiy-texnikalıq joybarlarǵa ajıratılatuǵın byudjet qarjılarınıń esabınan maqsetli grantlar ajıratılıwın támiyinlesin.
8. Ózbekistan Respublikası Qarjı ministrligi:
usı qararda názerde tutılǵan qárejetler ushın zárúr byudjet qarjıların 2017-jıl Ózbekistan Respublikası Mámleketlik byudjet parametrlerinde soсiallıq sala boyınsha názerde tutılǵan qarjılar sheńberinde ajıratsın, 2018-jıldan baslap bolsa Ózbekistan Respublikası Mámleketlik byudjetiniń parametrlerinde usı salaǵa ajıratılǵan qarjılar sheńberinde názerde tutsın;
biriktirilgen bir xızmet avtotransportın saqlap turıw ushın limit ajıratsın.
9. Tómendegiler:
shet elli qánigeler (ekspertler) diń miynetine haqı tólew muǵdarı Ózbekistan Respublikası Mádeniyat ministrliginiń Qarjı ministrligi menen kelisilgen usınısları tiykarında miynet shártnamasında belgilenetuǵını hám erkin konvertaсiyalanatuǵın valyutada ámelge asırılatuǵını;
shet elli qánigeler (ekspertler)ge Ózbekistan Respublikasında bolǵan dáwirinde bir kúnlik sapar qárejetleri 20 AQSh dollarına teń muǵdarda, kúndelikli ólshem boyınsha, Ózbekistan Respublikası Oraylıq bankiniń tólew kúnindegi kursı boyınsha milliy valyutada tólenetuǵını;
shet elli qánigeler (ekspertler)diń bir aydan aspaǵan múddettke dúzilgen qısqa múddetli miynet shártnamaları boyınsha elimizde jasaw qárejetleri Oray tárepinen milliy valyutada tólenetuǵını, bir aydan artıq múddetke dúziletuǵın miynet shártnamaları boyınsha shet elli qánigeler (ekspertler)diń jasaw qárejetleri ushın tólemler, dúzilgen shártnamanıń shártlerine muwapıq, aylıq miynet haqıların tólewde ámelge asırılatuǵını;
elimizdiń tariyxı hám mádeniyatına tiyisli, shet elde saqlanıp atırǵan mádeniy baylıqlardı anıqlaw, olar tuwralı tolıq maǵlıwmatlar bazasın qáliplestiriw hám izertlew ushın tartılatuǵın shet elli qánigeler (ekspertler)diń Oray menen dúzilgen miynet shártnaması sheńberinde alınatuǵın dáramatları fizikalıq shaxslardan alınatuǵın dáramat salıǵın tólewden azat etiletuǵını belgilep qoyılsın.
10. Ózbekistan Respublikası Málimleme texnologiyaların hám kommunikaсiyaların rawajlandırıw ministrligi bir ay múddette belgilengen tártipte, Oraydı zárúr baylanıs túrleri hám quralları, sonıń ishinde, Húkimetlik telefon baylanısı menen támiyinlesin, sonday-aq, keń kólemli internet tarmaǵınan paydalanıw imkaniyatın jaratıp bersin.
11. Ózbekistan Respublikası Oraylıq banki hám xızmet kórsetetuǵın kommerсiyalıq banklerge Oraydıń buyırtpaları boyınsha Oray qánigeleriniń hám oǵan basqa da shólkemlerden tartılatuǵın ekspertlerdiń shet elge xızmet saparlarına jáne shet elli qánigeler (ekspertler)diń miynetine haqı tólewge baylanıslı qárejetler ushın qarjılardı konvertaсiyalaw usınıs etilsin.
12. Ózbekistan Respublikası Sırtqı isler ministrligi:
Oraydıń shet ellerge xızmet saparına baratuǵın qánigeleri hám basqa da shólkemlerden tartılatuǵın ekspertler Ózbekistannıń shet mámleketlerdegi elshixanaları wákilleri tárepinen kútip alınıwına, shıǵarıp salınıwına, vizalardı rásmiylestiriwde hám dilmashlardı biriktiriwde jáne Oraydıń shet ellerdegi tiyisli shólkemler menen óz-ara birge islesiw baylanısların jolǵa qoyıwda hám rawajlandırıwda ámeliy járdem kórsetsin;
Oraydıń buyırpalarına muwapıq shet elden tartılatuǵın shet elli qánigeler (ekspertler)ge kiriw vizaları konsullıq jıyımları hám basqa da jıyımlar óndirilmesten rásmiylestiriliwin belgilengen tártipte támiyinlesin.
13. Ózbekistan Respublikası Ishki isler ministrligi Oraydıń buyırtpalarına muwapıq shet elden tartılatuǵın shet elli qánigeler (ekspertler)ge mámleketlik bajı óndirmesten, kóp mártelik kiriw vizaların beriliwin hám olardıń múddeti uzaytılıwın, sonday-aq, olardıń jasaw ornında waqtınsha dizimnen ótiwin hám waqtınsha dizimnen ótkeriw múddetiniń sozılıwın belgilengen tártipte támiyinlesin.
14. Ózbekistan Respublikası Investiсiyalar boyınsha mámleketlik komiteti mápdar ministrlikler hám vedomstvolar menen birgelikte Oraydıń jumısın támiyinlew, sonday-aq, elimizdiń tariyxına hám mádeniyatına tiyisli mádeniy baylıqlardıń maǵlıwmatlar bazasın – reestrin jaratıw, olardıń kóshirme nusqaların, foto hám video kórinislerin Ózbekistan Respublikasına alıp kiriw, hár qıylı ánjuman, konferenсiya hám kórgizbeler shólkemlestiriw ushın jeńillikli shet el kreditlerin hám grantların tartıw boyınsha xalıqaralıq qarjı institutları jáne sırt elli donorlar menen sistemalı jumıslar alıp barsın.
15. Oray:
Ózbekistan Respublikası Ilimler akademiyası hám Mádeniyat ministrligi menen birgelikte, bir ay múddette, Orayǵa tájiriybeli qánigeler puqta tańlaw tiykarında tańlap alınıwın jáne kadrlar menen tolıqtırılıwın támiyinlesin;
mápdar ministrlikler hám vedomstvolar menen birgelikte, eki ay múddette, nızam hújjetlerine usı qarardan kelip shıǵatuǵın ózgerisler menen qosımshalar kirgiziw haqqındaǵı usınıslardı Ózbekistan Respublikası Ministrler Kabinetine kirgizsin.
16. Ózbekistan Respublikası Ministrler Kabineti eki ay múddette Oray hám Komissiyanıń rejesin, respublikalıq mákemelerden ekspertlerdi, sonıń ishinde, shet elli qánigeler (ekspertler)di miynet shártnaması tiykarında tartıw tártibin tastıyıqlawdı jáne basqa da shólkemlestiriwshilik máselelerin názerde tutatuǵın Húkimetlik qarardı qabıl etsin.
17. Usı qarardıń orınlanıwın qadaǵalaw Ózbekistan Respublikasınıń Bas ministri A.Aripovqa hám Ózbekistan Respublikası Prezidentiniń mámleketlik keńesgóyi X.Sultanovqa júklensin.

Ózbekistan Respublikası
Prezidenti Sh.MIRZIYoEV

Tashkent qalası,
2017-jıl 20-iyun